Самарқандда блогерлигини айтиб, муаммони ҳал қилиш эвазига пул олиб келган шахс ушланди

Самарқандда ўзини блогер сифатида таништириб, фуқароларнинг турли муаммоларини пул эвазига ҳал қилиб беришни ваъда қилиб, уларни чув тушириб келган шахс қўлга олинди. Бу ҳақда Самарқанд вилояти ИИБ ахборот хизмати хабар берди.

Маълум қилинишича, 35 ёшли У.Чоршанбиев 2021 йилнинг август ойида фуқаро Д.Р.га ўзининг блогерлигини айтиб, 600 доллар эвазига уй-жой масаласи бўйича Фуқаролик ишлари бўйича Паст Дарғом туман судида кўрилаётган ишни ижтимоий тармоқларга жойлаш орқали ижобий ҳал қилиб беришни ваъда қилган. У 2 миллион сўм миқдоридаги пулларини олиб, ўзининг эҳтиёжларига ишлатиб юборган.

Бундан ташқари, У.Чоршанбиев ўзининг жиноий ҳаракатларини давом эттириб, 2021 йил 7 сентябрь куни фуқаро Ю.Д.дан 2 минг доллар эвазига унинг ноҳақ ишдан кетганини ижтимоий тармоқларга жойлаш орқали унга етказилган моддий зарарни қоплаш ва ишига қайта тиклаб беришини ваъда қилган. Ундан 1 000 доллар миқдоридаги пулларини олиб, ўзининг эҳтиёжларига ишлатган.

Шунингдек, У.Чоршанбиев 2021 йилнинг ноябрь ойида фуқаро Р.З.ни алдаб, 20 миллион сўм эвазига унга собиқ турмуш ўртоғи билан бўлаётган Фуқаролик ишлари бўйича Самарқанд шаҳар суди томонидан кўрилаётган ишда қатнашиб, муаммони ижтимоий тармоқларда кўтариб, фарзандини олиб беришни ваъда қилгани аниқланган. Шунингдек, у Тергов бўлими томонидан кўрилаётган жиноят иши бўйича унга етказилган 14 минг доллар зарарни қоплатиб беришни ваъда қилиб, Р.З.нинг 1 миллион сўм пулларини фирибгарлик йўли билан қўлга киритган.

2021 йилнинг 28 декабрида У.Чоршанбиевга нисбатан Жиноят кодексининг 168-моддаси (фирибагарлик) 3-қисми «б» банди билан сиртдан айб эълон қилиниб, унга нисбатан «сиртдан қамоққа олиш» тарзидаги эҳтиёт чораси қўлланилган. Мазкур шахсга нисбатан қидирув эълон қилиниб, жиноят иши Жиноят-процессуал кодексининг 364-моддаси 1-қисми 2-бандига асосан ҳаракатдан тўхтатилган.

Ҳозирда У.Чоршанбиев Қашқадарё вилояти ҳудудида ЖҚБ ходимлари томонидан ушланиб, Самарқанд вилоят ИИБ ППХ ЖТСБга қарашли вақтинча сақлаш ҳибсхонасига жойлаштирилган.

Ушбу шахсдан жабрланганлар бўлса, Самарқанд шаҳар бўйича ИИО ФМБ ҳузуридаги Тергов бўлимига мурожаат қилишлари сўралади.

Аввалроқ Андижонда боғча мудирасини қўрқитиб, ундан 350 доллар олган блогер қўлга олингани тўғрисида хабар берилганди.