Қирғизистон ва Тожикистон делегациялари ўртасидаги музокаралар натижасида икки давлат ҳарбий хизматчиларига қурол ишлатиш тақиқланди, фақатгина томонларнинг қонун ҳужжатлари талабларида назарда тутилган ҳолларда ўт очиш бундан мустасно. Бу ҳақда Қирғизистон Миллий хавфсизлик давлат қўмитаси Чегара хизматининг ахборот ва коммуникациялар бошқармаси маълум қилди, деб ёзади «24.kg».
Музокаралар 12 март куни «Гулистон автомобиль йўли» назорат-ўтказиш пунктида бўлиб ўтди.
Хабар қилинишича, томонлар чегара хавфсизлигини таъминлаш бўйича турли масалаларни кўриб чиққан, аммо биргаликда қўриқланадиган чегара ҳудудида нохуш ҳодисалар сонининг кўпайишига алоҳида эътибор қаратган. Икки давлат чегара вакиллари чегаранинг мувофиқлаштирилмаган участкалари билан боғлиқ муаммоларни қайд этган.
Учрашув якунлари бўйича қуйидаги келишувларга эришилди:
- икки давлатнинг чегарадош ҳудудларида нохуш ҳодисаларнинг олдини олишга қаратилган ўзаро ҳамкорлик ва саъй-ҳаракатларни мувофиқлаштириш бўйича ҳукуматлараро келишув ҳамда протоколларни амалга ошириш бўйича қатъий чоралар кўриш зарур;
- икки республиканинг чегара вакиллари ҳарбий хизматчилар ўртасида чегарада кўнгилсиз воқеалар содир бўлган тақдирда провокацияларга берилмаслик, чегарадаги вазиятнинг кескинлашувига ҳисса қўшаётган шахсларнинг бузғунчи ҳаракатларига қатъий чек қўйиш шартлигини таъкидлаган ҳолда тушунтириш ишларини олиб бориши керак;
- зиддиятли вазиятларни олдиндан кўра билиш ва олдини олиш учун томонларнинг чегара вакиллари доимий равишда мавжуд вазият тўғрисида маълумот алмашиши керак;
- икки давлат ҳарбий хизматчиларига қурол ишлатиш тақиқланади, ҳар икки томон қонун ҳужжатлари талабларида назарда тутилган ҳоллар бундан мустасно;
- қирғиз-тожик чегарасидаги барча ҳарбий хизматчилар чегара қўшинларининг ўзини тутиш талабларига қатъий риоя қилиши шарт.
Тожикистон томонининг маълум қилишича, музокаралар 7 соатдан ортиқ давом этган, деб ёзади «РИА Новости». Агентлик суҳбатдошининг айтишича, келишувлар натижаларига кўра, 10 март куни тожик чегарачисининг ўлимига сабаб бўлган қуролли ҳодиса юзасидан ҳар бир давлат алоҳида тергов олиб боради.
Эслатиб ўтамиз, 10 март куни эрталаб қирғиз-тожик чегарачилари ўртасидаги отишма содир бўлганди. Ҳодиса оқибатида Тожикистон томонидан бир нафар чегарачи ҳалок бўлган, яна икки нафари яраланган. Ўша суткада икки давлат чегарачилари ўртасида яна отишма содир бўлгани хабар қилинди.
Тожикистон ва Қирғизистон ўртасидаги бу каби низолар 1990 йиллардан буён кузатилади, икки давлат ўртасида 950 километр чегара ҳудуди белгилаб олинмаган ва унда икки томон келиша олмаётган баҳсли жойлар жуда кўп. Чегарани демаркация ва делимитация қилиш юзасидан музокаралар 2002 йилда бошланган ва шу кунга қадар икки юздан зиёд комиссия йиғилишлари ўтказилиб, ишчи гуруҳлар тузилган. Айни вақтда делимитация ва демаркация қилиш бўйича чегаранинг 550 километрга яқин линияси тартибга солиниши бошланган. Бироқ икки мамлакат ўртасида вақти-вақти билан гоҳ аҳоли, гоҳ чегарачилар ўртасида низолар, отишмалар содир бўлиши тўхтагани йўқ.
Изоҳ (0)