Британия ҳукуматининг Роман Абрамовичга қўйган санкциялари туфайли «Челси»нинг бир қатор ҳомийлари жамоа билан ҳамкорликни тўхтатмоқда.
Жумладан, Тhree телекоммуникацион компанияси «Челси» билан ҳамкорликни тўхтатди.
«Ҳукумат томонидан яқинда эълон қилинган санкциялардан келиб чиқиб, ‘Челси’ билан ҳамкорликни вақтинча тўхтатишни, кейинги огоҳлантиришгача логотипимизни футболкалар ва майдон атрофидан олиб ташлашни сўраб қоламиз.
Ушбу қарор жамоанинг жонкуяр мухлисларига таъсир қилишини биламиз. Бироқ, вазият ва ҳукуматнинг санкцияларини ҳисобга олган ҳолда, биз буни тўғри деб ҳисоблаймиз», — дейди «Челси» бош ҳомийси вакили.
Лондон клубинининг техник ҳомийси ҳисобланган Nike компанияси ҳам жамоа билан ҳамкорликни тўхтатишни ўйламоқда.
2016 йилда «Челси» ва Nike 15 йилга мўлжалланган 900 миллион фунтлик шартнома имзолаганди. Агар компания «аристократлар» билан ишлашдан бош тортса, у ҳолда клуб 540 миллион фунт стерлинг йўқотади.
10 март куни Буюк Британия ҳукумати «Челси»нинг собиқ хўжайини Роман Абрамовичга нисбатан санкциялар киритганди.
Эслатиб ўтамиз, 27 февраль куни Абрамович Украинадаги вазият туфайли «Челси» бошқарувини клуб хайрия фондига топширди. 3 март куни эса 2003 йилдан бери бошқариб келаётган жамоасини сотишга қарор қилганини маълум қилди.
Аввалроқ UFC собиқ чемпиони Конор Макгрегор Лондон жамоасини харид қилишга тайёрлигини билдирганди. Саудия Арабистони консорсиуми ҳам «Челси»ни харид қилиш учун курашга қўшилганди.
Изоҳ (0)