Qamchiq dovonidan o‘tgan avtomobil yo‘lining 236—241=kilometrlari oralig‘ida (ikki tunnel oralig‘i) maydalab qor yog‘moqda. Bu haqda yo‘l harakati xavfsizligi xizmati xabar qildi.
Qayd etilishicha, yo‘lni qordan tozalash ishlari maxsus texnikalar yordamida olib borilmoqda.
“Barcha haydovchilardan ob-havo sharoitini inobatga olgan holda, tezlikni me’yordan oshirmasdan, oraliq masofani saqlab harakatlanishlarini so‘raymiz”, — deyiladi xabarda.
Avvalroq “O‘zgidromet” respublika bo‘yicha vaqti-vaqti bilan yomg‘ir yog‘ishi bilan kuzatiladigan beqaror ob-havo keyingi haftaning birinchi yarmigacha saqlanib turishini ma’lum qilgandi. Qayd etilishicha, dam olish kunlari respublika hududining katta qismida yomg‘ir yog‘adi, ba’zi joylarda kuchli bo‘ladi, momaqaldiroq bo‘lishi mumkin. Faqat Qoraqalpog‘istonda va Xorazm viloyati ayrim hududlarida yog‘ingarchilik kamroq bo‘ladi.
Eslatib o‘tamiz, O‘zbekiston hududiga 10—16-mart kunlari Erondan iliq va nam havo, so‘ngra Kavkaz hududlaridan nisbatan salqin havo massasi kirib kelishi kutilmoqda. 11—16-martda respublika hududining katta qismida vaqti-vaqti bilan yomg‘ir yog‘adi, momaqaldiroq bo‘lishi mumkin. Shuningdek, 11—13-mart kunlari A-373 Toshkent—O‘sh avtoyo‘lining Qamchiq dovoni hududida vaqti-vaqti bilan kuchli yog‘ingarchilik, tuman kuzatilishi, ko‘rinuvchanlik 50 metrgacha pasayishi, shamol tezligi 20—23 m/s gacha kuchayishi, avtoyo‘lda qor uyumlari yuzaga kelishi mumkin.
“O‘zgidromet” 11—15-mart kunlari kutilayotgan kuchli yomg‘irlar yog‘ishi sababli respublikaning tog‘oldi va tog‘li hududlarida sel xavfidan ogohlantirdi. Respublikaning tog‘oldi va tog‘li hududlarida sel xavfi mart oyi boshidan buyon saqlanib qolmoqda. “O‘zgidromet” beqaror ob-havo ish haftasining oxirigacha saqlanib turishini prognoz qilgan.
Izoh (0)