Ўзбекистон Мудофаа вазирлиги терма жамоаси Покистонда 1 мартидан бошланган V Халқаро «Жамоа руҳи» мусобақасида иштирок этиб, биринчи ўринни қўлга киритди. Бу ҳақда вазирлик матбуот хизмати «Дарё»га маълум қилди.
Маълум қилинишича, мусобақа Покистон Қуролли Кучларига қарашли 22-армия корпуси Терроризмга қарши курашиш миллий ўқув маркази (Пабби шаҳри) базасида ўтказилган. Унда 9 та давлатдан — Марокаш, Иордания, Кения, Саудия Арабистони, Туркия, Шри-Ланка, Непал, Ўзбекистон, шунингдек Покистондан 8 та разведка гуруҳи, жами 16 та разведка жамоалари ўзаро беллашган.
Мусобақа жараёнини Тожикистон, Қозоғистон, Баҳрайн ва Хитой давлатларининг Қуролли Кучлар вакиллари кузатиб борган.
Мусобақа шартларига кўра, жамоалар 80 километргача бўлган маршрутнинг 6 та назорат нуқтасида азимут бўйича ҳаракатланиб, назорат нуқталарида тактик-махсус, отиш, тиббий, алоқа, муҳандислик тайёргарлиги, оммавий қирғин қуроллардан ҳимоя ва ҳарбий топографиядан турли махсус машқларни, шунингдек, кутилмаган тестларни ечиш машқини бажарган.
«Ўзбекистон Мудофаа вазирлиги терма жамоаси қуръага биноан биринчи назорат нуқтасидан 10-бўлиб ҳаракатланишни бошлаган бўлса-да, ушбу мусобақанинг учинчи назорат нуқтасида қолган жамоалардан 6 соат олдин етиб борган ва энг юқори (2 850) баллни қўлга киритди», — дейилади хабарда.
Мусобақа якунида, Покистон қуруқликдаги қўшинлар қўмондони генерал майор Аднан Ўзбекистон ҳарбий хизматчиларининг жисмоний ва профессионал тайёргарлигини алоҳида таъкидлаб, «Мен Ўзбекистон жамоаси кучли эканлигини билардим ва 1-ўринни эгаллашига шубҳам йўқ эди», дея жамоа гуруҳининг ҳаракатлари турли экстремал шароитлардаги ностандарт қарор қабул қилиш каби ҳаракатларини юқори баҳолаган
Мусобақа якуни бўйича:- 1-ўрин – Ўзбекистон жамоаси (2 850 балл);
- 2-ўрин – Марокаш жамоаси (1 860 балл);
- 3-ўрин – Шри-Ланка (2 010 балл) ва Саудия Арабистони (1 900 балл).
Халқаро мусобақанинг ёпилишига бағишланган тантанали маросимда ғолиб жамоа ва совриндорлар, шу жумладан, Ўзбекистон жамоаси олтин медал билан тақдирланган.
Эслатиб ўтамиз, 2017 йили Ўзбекистон разведкачилари «Кембрия патрули» мусобақасида 2-ўринни, 2018- ва 2019 йилларда биринчи ўринларни, 2021 йилда эса 2-ўринни қўлга киритган эди.
Изоҳ (0)