Таниқли иммунолог, асли самарқандлик Раҳим Хаитов 78 ёшида Москвада вафот этди. Бу ҳақда Telegram’даги «Нигоҳ» канали хабар қилди.
Қайд этилишича, Раҳим Мусаевич 1944 йил 6 январда Самарқанд шаҳрида туғилган, Россия Фанлар академияси, Россия Тиббиёт фанлари академияси академиги, тиббиёт фанлари доктори, профессор. 1988—2014 йилларда Россия Иммунология институти директори сифатида ишлаган.
1967 йилда И.П.Павлов номидаги Самарқанд давлат тиббиёт институтини тамомлаган. 1972 йилда у нурланган реципиентларга гематопоетик тўқималарни трансплантация қилиш билан боғлиқ муаммолар бўйича докторлик диссертациясини ҳимоя қилган ва Совет Иттифоқининг энг ёш тиббиёт фанлари доктори бўлган.
У Россия аллергологлар ва клиник иммунологлар уюшмаси президенти, ЖССТ иммунология бўйича эксперти бўлган. Шунингдек, ОИВга қарши рус вакцинасининг ишлаб чиқувчиларидан бири сифатида танилган.
Изоҳ (0)