Дунёнинг учта энг йирик овоз ёзиш компаниялари Россиядаги фаолиятини тўхтатди

Дунё мусиқа бозорининг 70 фоизини назорат қилувчи овоз ёзиш лейбллар катта учлигининг барча аъзолари Украинадаги уруш туфайли Россиядаги фаолиятлари тўхтаганини эълон қилди.

10 март куни Sony Music Россиядаги фаолияти тўхтатилганини билдирган.

«Sony Music Group Украинада тинчлик ўрнатишга ва зўравонликни тўхтатишга чорлайди. Биз Россиядаги барча бизнес-операцияларини вақтинча тўхтатдик ва муҳтожларга ижтимоий кўмак беришда давом этамиз», — дейилади компания баёнотида.

Variety маълумотларига кўра, компания ходимлари номуайян вақт давомида ойлик маошларини олишда давом этади, артистлар билан боғлиқ вазият ўрганиш ва таҳлил жараёнида қолмоқда.

Sony Music’дан кейин Warner Music ҳам Россиядаги фаолияти давом этмаслигини маълум қилди.

«WМG Россиядаги фаолиятини, хусусан, инвестициялар ва ривожланиш лойиҳалари, ривожланиш ва маркетинг фаолиятини, шунингдек, ўз жисмоний ташувчиларини ишлаб чиқаришни ҳам тўхтатади. Биз бу борада максимал даражада ўйланган жиддий қадамни қўйишга қарор қилдик. Келгусида ходимларимиз, артистлар ва муаллифлар олдидаги мажбуриятларимизнинг бир қисмини бажарамиз ҳамда вазиятнинг ривожланишига қараб чоралар кўрамиз», — дейилади Meduza’га келиб тушган компания баёнотида.

Шунингдек, яна бир катта овоз ёзиш компанияси Universal Music Россиядаги офислари ёпилгани ва 8 мартдан бошлаб мамлакатдаги барча бизнес-операциялари тўхтатилганини эълон қилди.

«Биз Украинадаги зўравонликка чек қўйишга чақирамиз. Биз АҚШ, Буюк Британия, Польша, Словакия, Германия, Чехия ва Венгрияда ишлайдиган ходимларимиз ҳамда артистлар билан биргаликда халқаро санкцияларни қўллаб-қувватлаймиз, ҳудуддан чиқиб кетган қочоқларга ижтимоий ёрдам бериш хатти-ҳаракатларини тўлиқ қўллаб-қувватлаймиз», — дейилади ушбу компания баёнотида.

Аввал Western Union халқаро пул ўтказиш тизими Россияда ва Беларусдаги хизматларини тўхтатгани, Visa ҳамда Mastercard Россиядаги фаолиятини тўхтагани, шунингдек, Россияда инглиз тили бўйича IELTS имтиҳонлари бекор қилингани ҳақида хабарлар берилганди.