9 март куни Украинадан Польшанинг Катовице аэропорти орқали 245 нафар Ўзбекистон фуқароси, шу жумладан, 35 нафар аёл, 20 нафар вояга етмаган шахс ва 3 нафар чақалоқ олиб келинди. Бу ҳақда Ўзбекистон ТИВ расмий вакили маълум қилди.
Таъкидланишича, 28 февралдан 10 мартга қадар 22 та авиарейс ташкиллаштирилган ҳамда ҳарбий ҳаракатлар кечаётган ҳудудлардан 5 282 нафар Ўзбекистон фуқароси ватанга қайтарилган.
Молдова ҳудудида бўлган 94 нафар фуқаро Ўзбекистон дипломатлари ҳамроҳлигида Молдова—Руминия чегарасини кесиб ўтган. Уларни махсус рейс билан Бухарест аэропортидан эвакуация қилиш режалаштирилган.
Аввалроқ Украинанинг Молдова билан чегарадош жойларида яшовчи 200 га яқин ўзбекистонлик бошпана излаб, Молдова ҳудудига ўтгани тўғрисида хабар берилганди. Мамлакат инсонпарварлик нуқтаи назаридан, фуқаролигидан қатъи назар, ўз ҳудудига кираётган барча шахсларни ташиш, жойлаштириш, овқатлантириш ва бошқа зарур масалаларда кўмак бермоқда. Кейинроқ Ўзбекистон ТИВ расмий вакили Молдова ҳудудида бўлиб турган Ўзбекистон фуқароларини олиб чиқиш масаласини ишлаб чиқиш бошланганини маълум қилганди.
Изоҳ (0)