Ижтимоий тармоқларда Самарқанд вилоятида қиз ўз онасини ураётгани акс этган видео тарқалди. Самарқанд вилояти ИИБ мазкур ҳолатга муносабат билдириб, она-боланинг шахсига аниқлик киритилганини маълум қилди.
Видеода қиз ўз онасининг ёқасидан олгани ва ўқлов билан ургани тасвирланган. Ҳолатни тасвирга олган аёлнинг сўзларига кўра, можаро пул сабаб келиб чиққан.
Самарқанд вилояти ИИБ матбуот котибининг ёзишича, видеотасвирдаги ҳолат 2022 йил 14 февраль куни Самарқанд шаҳар «Боғибаланд» МФЙда ҳудудида содир бўлган.
Самарқанд шаҳар «Имом Восе» МФЙда яшовчи 57 ёшли Ҳ.Н. «Боғибаланд» МФЙда яшовчи кенжа қизи И.Н.нинг (1997 йилда туғилган) яшаш уйига келиб, у билан ўзаро уй-жой масаласида тортишиб қолиши натижасида она ва бола ўртасида келишмовчилик юзага келган.
Ҳолат Самарқанд шаҳри бўйича ИИО ФМБ 6-сон ИИБ ходимлари томонидан ҳужжатлаштирилиб, ҳозирда терговга қадар текширув ҳаракатлари олиб борилмоқда.
Эслатиб ўтамиз, 2021 йилнинг августида Қашқадарё ҳокими қабулида бўлган онахон номаълум сабабга кўра қизи томонидан таҳқирлангани акс этган видео тарқалган эди. Кейинроқ фарзандидан тарсаки еган 70 ёшли қашқадарёлик онахонга ҳимоя ордери берилган, қиз эса неврологик диспансерга тиббий кўрик учун юборилганди.
Изоҳ (0)