Сўнгги бир ҳафта ичида Украина президенти Владимир Зеленскийнинг ҳаётига камида уч марта суиқасд уюштирилган. Бу ҳақда Британиянинг The Times газетаси хабар берди.
Нашр маълумотларига кўра, Украина президентини ўлдириш топшириғи билан мамлакатга иккита гуруҳ юборилган — «Вагнер» ёлланма жангарилари ва чечен махсус хизматлари.
Газетанинг ёзишича, суиқасдларнинг барчаси Украинадаги урушга қарши чиқаётган Федерал хавфсизлик хизмати ходимларининг ҳаракатлари туфайли барбод бўлган.
Гуруҳга яқин бўлган нашр манбасининг таъкидлашича, «Вагнер» аъзолари йўқотишларга учраган. У президент хавфсизлик хизматининг операциядан хабардорлигини «ақл бовар қилмас» даражада дея изоҳлаган.
Аввалроқ Кремль топшириғига кўра «Вагнер» хусусий ҳарбий компаниясининг 400 дан ортиқ ёлланма жангарилари Киевда жанг қилаётгани тўғрисида хабар берилганди. «Вагнер» гуруҳи — ОАВларда Россия хусусий ҳарбий компанияси деб аталувчи норасмий қуролли тузилма. Маълумотларга кўра, 2014 йилдан буён гуруҳ Украина ва Сурия ҳудудларида жанг қилган. 2017 йилда «Вагнер» гуруҳи АҚШ санкциялар рўйхатига киритилган.
Изоҳ (0)