Макрон Франция президентлиги учун иккинчи муддатга ўз номзодини қўяди

Франция президенти Эммаунел Макрон французлардан республика президенти лавозимига янги мандат беришларини сўради, деб хабар беради BFMTV.

«Мен сиз билан бирга аср чақириқларига ўзига хос француз ва Европа жавобларини топиш учун номзодман. Мен дунёдаги тўнтаришлар таҳдиди остида қолган қадриятларимизни ҳимоя қилишга номзодман. Мен фарзандларимиз ва набираларимиз учун келажак тайёрлашни давом эттирадиган номзодман. Бугун ва эртага ўзимиз учун қарор қабул қила олишимиз учун», — дейилади Макроннинг халққа йўллаган мурожаатида.

«Сўнгги беш йил ичида кўплаб синовлардан ўтдик. Терроризм, пандемия, зўравонликка қайтиш, Европада уруш. Франция бундай инқирозлар тўпламига камдан кам дуч келган. Биз уни биродарлик ва қадр-қиммат ила кутиб олдик», — деб ёзади Франция президенти.

Унинг сўзларига кўра, миллат «ақл бовар қилмайдиган тезликдаги ўзгаришларни бошдан кечирмоқда: демократияга таҳдидлар, ортиб бораётган тенгсизлик, иқлим ўзгариши, демографик ўтишлар, технологик ислоҳотлар». Макроннинг ҳисоблашича, фақат жасорат, ирода ва келажакка иштиёққа бўйсунмасдан муваффақиятга эришиш мумкин.

«Муаммо болалигимиздаги Францияни қайта тиклаш эмас, балки фарзандларимиз Франциясини қуришдир», — дейди давлат раҳбари.

«Мана нима учун мен республика президенти сифатидаги янги мандатга ишончингизни сўраяпман», — дея тушунтиради Макрон. У узоқ вақт давомида апрель ойида бўлиб ўтадиган президентлик сайловларига оид режаларини жамоатчиликка ошкор этмай келаётганди.

Франция ОАВларида эълон қилинга прогнозларга кўра, Макрон президентлик сайлов кампаниясидаги бошқа иштирокчилардан кўра юқори рейтингга эга. Ундан кейинги ўринда «Миллий уюшма» ўнг партиясидан номзод Марин Ле Пен кетмоқда. Бироқ сўровлар сайловларнинг иккинчи турида Макрон ғалаба қозонишини кўрсатмоқда.

Маълумот учун, 2014 йилгача жамоатчиликка унча таниш бўлмаган Макрон ўша йили бош вазир Мануэль Валс ҳукуматида Франция иқтисодиёт вазири этиб тайинланган. Бу лавозимда икки йил фаолият олиб борган Макрон 2016 йилда ўз партиясини тузиб, вазирликдан истеъфо берган ва президентлик сайловида қатнашиш учун номзодини илгари сурган. 2017 йил май ойида бўлиб ўтган сайловда мутлақ ғалаба қозониб, Франция республикасининг навбатдаги президенти этиб сайланган — бу билан у Франция республикаси тарихида энг ёш президент бўлди.