Украина делегацияси музокаралар учун Беларусга жўнаб кетгани хабар қилинди

Беларусь Миллий матбуот маркази беларуслик сиёсатчи Юрий Воскресенскийга таяниб, Украина делегацияси Гомелдаги музокаралар учун жўнаб кетгани ҳақида хабар берди. Ҳозирча маълумот Киев томонидан тасдиқланмаган.

Россия делегацияси раҳбари, Россия президентининг ёрдамчиси Владимир Мединскийнинг айтишича, Киев Гомелдаги музокараларга тайёрлигини тасдиқлаган. Мединскийнинг сўзларига кўра, Россия делегацияси аъзолари музокаралар учун Минскдан Гомелга йўл олган.

Кейинроқ Россия президентининг матбуот котиби Дмитрий Песков Россия делегацияси Гомелда экани ва музокараларга тўлиқ тайёрлигини маълум қилди. Унинг айтишича, делегация Украина вакилларини кутмоқда.

Украина делегастиясининг Беларусга йўл олгани ҳақидаги хабардан бир соатча олдин Украина президенти Владимир Зеленский Беларусь президенти Александр Лукашенко билан телефон орқали мулоқот қилганини айтганди.

Аввалроқ Мединский Россия томони Украина делегациясининг Гомелдаги музокараларга келиши ва у ерда бўлиб туриши давомидаги хавфсизлигини кафолатлаганини маълум қилган.

«Томонлар Украина делегациясининг йўналишини батафсил ишлаб чиқди, келишиб олинди, биз Украина делегациясининг мутлақ хавфсизлигини таъминладик ва кафолатладик», — деди президент ёрдамчиси.

Ундан аввал Зеленский музокаралар учун Варшава, Будапешт ва Истанбул сингари бошқа шаҳарни танлашни таклиф қилган эди. У ҳарбий ҳужумлар Беларусь томонидан ҳам амалга оширилгани сабабли ушбу давлат ҳудудида музокаралар олиб бормоқчи эмаслигини айтган.

24 февраль куни Украинага Россия босқини бошланганидан бир неча соат ўтиб, Беларусь президенти Александр Лукашенко томонларни Минскда музокара ўтказишга таклиф қилганди. 25 февраль куни Украина президенти офисининг вакили ва Зеленскийнинг ўзи музокара ўтказиш таклифи билан чиқган.

26 февраль куни Украина томони Россия бир қатор «қабул қилиб бўлмайдиган» ультиматум талабларини илгари сургани ҳақида хабар берган. Шундан сўнг, йиғилиш қаерда ва қандай таркибда ўтиши тўғрисидаги муҳокама бир муддат тўхтатилган.