Россия делегацияси Украина билан музокаралар ўтказиш учун Беларусга етиб келди, дея маълум қилди президент матбуот котиби Дмитрий Песков. Делегация таркибидан Ташқи ишлар вазирлиги, Мудофаа вазирлиги, президент маъмурияти «ва бошқа идоралар вакиллари жой олган».
«Биз ушбу музокараларни Гомел шаҳрида бошлашга тайёрмиз», — деди Песков.
Минск Россия ва Украина ўртасида Гомелдаги музокаралар учун зарур бўлган ҳамма нарсани тайёрлаб қўйган ва протокол масалалари ҳал этилишини таъминламоқда, дейилади Беларусь Ташқи ишлар вазирлиги баёнотида.
Украина президенти Владимир Зеленский Киев Россия билан тинчлик ва музокараларни исташини айтди. Аммо у музокаралар учун Варшава, Будапешт ва Истанбул сингари бошқа шаҳарни танлашни таклиф қилмоқда. Зеленскийнинг айтишича, ҳарбий ҳужумлар Беларусь томонидан ҳам амалга оширилгани сабабли у ушбу давлат ҳудудида музокаралар олиб бормоқчи эмас.
Агар ҳудудингиздан ҳеч қандай агрессив ҳаракатлар бўлмаганида эди, Минскда гаплашишимиз мумкин бўларди. Бизга ҳудудидан ракеталар учмайдиган исталган мамлакатдаги ҳар қандай шаҳар маъқул келади. Шундагина музокаралар ҳалол бўлиши ва урушга чиндан барҳам бериши мумкин, — деди Украина президенти.24 февраль куни Украинага Россия босқини бошланганидан бир неча соат ўтиб, Беларусь президенти Александр Лукашенко томонларни Минскда музокара ўтказишга таклиф қилганди. 25 февраль куни Украина президенти офисининг вакили ва Зеленскийнинг ўзи музокара ўтказиш таклифи билан чиқди. Баёнот Украинанинг «бетарафлик мақоми»ни муҳокама қилишга тайёрлиги ҳақида эди.
Ўша куни Кремль Россия президенти Минскда музокаралар ўтказишни таклиф қилаётгани ва у ерга делегация юборишга тайёрлигини маълум қилди. Кейинроқ Дмитрий Песков Украина Минскда учрашишдан бош тортганини, кейин эса «умуман алоқани узиб қўйганини» айтди. Украина президентининг матбуот котиби Сергей Никифоров буни рад этди. У Киев ва Москва «музокара жойи ва вақти»ни муҳокама қилаётганини билдирган.
26 февраль куни Украина томони аввалроқ Россия бир қатор «қабул қилиб бўлмайдиган» ультиматум талабларини илгари сургани ҳақида хабар берди. Шундан сўнг, йиғилиш қаерда ва қандай таркибда ўтиши тўғрисидаги муҳокама тўхтатилди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Мавзуга доир:
- Зеленский Алиев ва Эрдўғон Путин билан музокаралар бўйича таклифлар билан чиқишганини маълум қилди
- Путин Украина ҳарбийларидан мамлакатда ҳукуматни ўз қўлларига олишни сўради
- Украина Россия билан бетарафлик мақоми ҳақида гаплашишдан қўрқмайди, аммо келишувларнинг бажарилишига ким кафолат беради? — Украина президенти офиси
Изоҳ (0)