Беларусда бугун, 27 февраль куни мамлакат Конституциясига ўзгартиришлар киритиш бўйича референдумнинг асосий куни бошланди. 22—26 февраль кунлари муддатидан олдин овоз бериш бўлиб ўтганди. Бугун сайлов участкалари Минск вақти билан 08:00 дан 20:00 гача очиқ бўлади.
Овоз бериш бюллетенида фақат битта савол бор: «Сиз Беларусь Республикаси Конституциясига киритилган ўзгартириш ва қўшимчаларни қабул қиласизми ёки йўқ?». Референдумда қабул қилинган қарор расман эълон қилинганидан кейин 10 кун ўтиб кучга киради.
Сайловчилар рўйхатига мамлакатнинг 6 миллион 818 минг 948 нафар фуқароси киритилган бўлиб, бу 2020 йилги президентлик сайловига нисбатан 26 минг кишига кам. Республика бўйича 5,5 мингта участка комиссиялари ва аъзоларнинг рўйхати тузилган. Беларусдан ташқарида сайлов участкаларини очмасликка қарор қилинди. Овоз беришда Европада Хавфсизлик ва Ҳамкорлик Ташкилоти кузатувчилари бўлмайди, дейилади хабарда.
Беларусь конституциясига киритилган барча ўзгартириш ва қўшимчалар Александр Лукашенконинг 2022 йил январдаги фармонида тақдим этилган. Улар орасида бир шахснинг икки муддатдан ортиқ мамлакат президенти бўлишини тақиқлаш таклиф қилинган. Бундан келиб чиқадики, ўзгаришлар кучга киргандан сўнг, янги конституцияга мувофиқ Лукашенко яна икки марта давлат раҳбари этиб сайланиш имконига эга бўлади. Амалдаги конституцияда эса ҳеч қандай чекловлар йўқ.
Изоҳ (0)