Тошкентдаги қатор ДХМларда «права» алмаштирмоқчи бўлганлар учун «сўнгги мижозгача» иш режими жорий этилди

Сўнгги вақтларда Давлат хизматлари марказларида ҳайдовчилик гувоҳномасини алмаштириш учун ташриф буюрувчилар оқими сезиларли ошган. Давлат хизматлари агентлиги ДХМларга ташриф буюрувчи фуқаролар, жамоатчилик вакиллари ва ижтимоий тармоқлар фойдаланувчилари фикри ва таклифларини тинглаб, бу борада юзага келаётган муаммони ҳал қилди. Бу ҳақда агентлик матбуот хизмати хабар берди.

Аҳолига қулай бўлиши учун эски ҳайдовчилик гувоҳномасини янги намунадагисига алмаштиришнинг сўнгги муддати 2021 йили декабрь ойидан 2022 йил 31 декабрга қадар узайтирилган ва бу жараён 4 босқичда амалга оширилиши белгиланган. Яъни:

• 2010 йилгача берилганлари — 2022 йил 31 мартгача;
• 2010—2012 йилларда берилганлари — 2022 йил 30 июнгача;
• 2013—2015 йилларда берилганлари — 2022 йил 30 сентябргача;
• 2015 йилдан кейин берилганлари — 2022 йил 31 декабргача.

Агентликнинг аниқлашича, муаммонинг асосий сабаби 2022 йил 31 март куни эски гувоҳномаларни алмаштиришнинг биринчи босқичи якунланиши, 2010 йилгача берилган эски «права»лар ҳақиқий эмас деб ҳисобланиши ва белгиланган муддатда ҳужжатини алмаштирмаганлар сонининг кўплигида. Бу эса марказларга ташриф буюрувчилар оқимининг сезиларли ортишига сабаб бўлган.

ДХА масъуллари томонидан ДХМларга хизматдан фойдаланиш учун ташриф буюрувчилар кўплиги, жумладан, улар орасида ҳудудлардан ҳам ташриф буюраётганлар оз эмаслигини, шунингдек, фуқароларга ушбу давлат хизматини кўрсатишда қўшимча қулайлик яратиш мақсадида:

• Тошкент шаҳрининг Миробод, Мирзо Улуғбек, Яшнобод, Яккасарой, Сергели, Чилонзор, Учтепа, Шайхонтоҳур, Олмазор, Юнусобод тумани Давлат хизматлари марказларида 2022 йилнинг 21 февраль кунидан бошлаб, «Сўнгги мижозгача» иш режими ташкил қилинган. Бунинг учун иш графиги меҳнат қонунчилиги доирасида қайта кўриб чиқилган.

Бунда, юқорида қайд этилган ДХМлар орқали ҳайдовчилар душанбадан—жума кунига қадар эрталаб соат 09:00 дан кечгача ҳамда шанба куни соат 09:00 дан 13:00 га қадар хизматдан фойдаланиши мумкин.

Аввалроқ Тошкентдаги икки ЙҲХБ бўлимида эски намунадаги ҳайдовчилик гувоҳномаларини янгисига алмаштириш имкони яратилгани тўғрисида хабар берилганди.

Эслатиб ўтамиз, 3 февраль куни Тошкентда ҳайдовчилик гувоҳномасини олиш учун имтиҳон топшириш бўйича Тошкент имтиҳон маркази иш бошлади. Ички ишлар вазири ўринбосари, жамоат хавфсизлиги департаменти бошлиғи Бекмурод Абдуллаев фақат етарли билим ва малакага эга ҳайдовчиларга гувоҳнома берилишни бошлагач, йўлларда ҳайдовчилик маданияти ошади, йўл-транспорт ҳодисалари камайишини айтиб ўтди.