Toshkentdagi qator DXMlarda “prava” almashtirmoqchi bo‘lganlar uchun “so‘nggi mijozgacha” ish rejimi joriy etildi

So‘nggi vaqtlarda Davlat xizmatlari markazlarida haydovchilik guvohnomasini almashtirish uchun tashrif buyuruvchilar oqimi sezilarli oshgan. Davlat xizmatlari agentligi DXMlarga tashrif buyuruvchi fuqarolar, jamoatchilik vakillari va ijtimoiy tarmoqlar foydalanuvchilari fikri va takliflarini tinglab, bu borada yuzaga kelayotgan muammoni hal qildi. Bu haqda agentlik matbuot xizmati xabar berdi.

Aholiga qulay bo‘lishi uchun eski haydovchilik guvohnomasini yangi namunadagisiga almashtirishning so‘nggi muddati 2021-yili dekabr oyidan 2022-yil 31-dekabrga qadar uzaytirilgan va bu jarayon 4 bosqichda amalga oshirilishi belgilangan. Ya’ni:

• 2010-yilgacha berilganlari — 2022-yil 31-martgacha;
• 2010—2012-yillarda berilganlari — 2022-yil 30-iyungacha;
• 2013—2015-yillarda berilganlari — 2022-yil 30-sentabrgacha;
• 2015-yildan keyin berilganlari — 2022-yil 31-dekabrgacha.

Agentlikning aniqlashicha, muammoning asosiy sababi 2022-yil 31-mart kuni eski guvohnomalarni almashtirishning birinchi bosqichi yakunlanishi, 2010-yilgacha berilgan eski “prava”lar haqiqiy emas deb hisoblanishi va belgilangan muddatda hujjatini almashtirmaganlar sonining ko‘pligida. Bu esa markazlarga tashrif buyuruvchilar oqimining sezilarli ortishiga sabab bo‘lgan.

DXA mas’ullari tomonidan DXMlarga xizmatdan foydalanish uchun tashrif buyuruvchilar ko‘pligi, jumladan, ular orasida hududlardan ham tashrif buyurayotganlar oz emasligini, shuningdek, fuqarolarga ushbu davlat xizmatini ko‘rsatishda qo‘shimcha qulaylik yaratish maqsadida:

• Toshkent shahrining Mirobod, Mirzo Ulug‘bek, Yashnobod, Yakkasaroy, Sergeli, Chilonzor, Uchtepa, Shayxontohur, Olmazor, Yunusobod tumani Davlat xizmatlari markazlarida 2022-yilning 21-fevral kunidan boshlab, “So‘nggi mijozgacha” ish rejimi tashkil qilingan. Buning uchun ish grafigi mehnat qonunchiligi doirasida qayta ko‘rib chiqilgan.

Bunda, yuqorida qayd etilgan DXMlar orqali haydovchilar dushanbadan—juma kuniga qadar ertalab soat 09:00 dan kechgacha hamda shanba kuni soat 09:00 dan 13:00 ga qadar xizmatdan foydalanishi mumkin.

Avvalroq Toshkentdagi ikki YHXB bo‘limida eski namunadagi haydovchilik guvohnomalarini yangisiga almashtirish imkoni yaratilgani to‘g‘risida xabar berilgandi.

Eslatib o‘tamiz, 3-fevral kuni Toshkentda haydovchilik guvohnomasini olish uchun imtihon topshirish bo‘yicha Toshkent imtihon markazi ish boshladi. Ichki ishlar vaziri o‘rinbosari, jamoat xavfsizligi departamenti boshlig‘i Bekmurod Abdullayev faqat yetarli bilim va malakaga ega haydovchilarga guvohnoma berilishni boshlagach, yo‘llarda haydovchilik madaniyati oshadi, yo‘l-transport hodisalari kamayishini aytib o‘tdi.