Жиноят ишлари бўйича Яккасарой туман судининг 14 февралдаги қарори билан Маъмурий жавобгарлик тўғрисидаги кодексининг 201-моддаси 2-қисмида (диний йиғилишлар, кўча юришлари ва бошқа диний маросимлар ўтказиш қоидаларини бузиш) назарда тутилган ҳуқуқбузарликни содир этган, деб топилган Ф. Р. иши бўйича суд қарори эълон қилинди. Бу ҳақда Олий суд хабар бермоқда.
Ф.Р. Тошкент шаҳар Яккасарой туманида жойлашган GTA Showroom МЧЖ биноси ҳудудида жойлашган хоналарда ўз ишчи ходимлари ва корхонага келган мижозларга намоз амалларини адо этиш учун шароитлар яратиб бергани аниқланган.
Суд мажлисида у ўзига тегишли корхонада намоз ўқиш учун шароит яратиб берганини тан олиб, ёмон нияти бўлмаганини, қилган ишидан пушаймонлигини билдирган.
Қайд этилишича, Ф.Р.га (1987 йилда Навоий вилоятида туғилган) базавий ҳисоблаш миқдорининг 80 баравари миқдорида жарима жазоси тайинланган.
«Ижтимоий тармоқларда муҳокама ва тортишувларга сабаб бўлаётган мазкур суд қарорининг қонунийлигига юқори инстанция суди томонидан ҳуқуқий баҳо берилишини эслатиб ўтамиз», — дейилади хабарда.
Мавзуга доир:
- Самарқандда газ йўқлиги сабаб норозилик билдириб, йўлни тўсган фуқароларнинг икки нафари 5 суткага қамалди, 11 нафарига жарима тайинланди
- «Қўйлиқ» бозори бузилишидан норози бўлиб йўл тўсган шахслар қамоққа олинди
- Жиззахда «сеҳр-жоду қилиш» билан шуғулланиб келган шахс ушланди. Унга ҳоким ва депутат бўлишни сўраб келганлар ҳам бор
Изоҳ (0)