Украина Ташқи ишлар вазирлиги ва ҳукумат сайтларига DDoS ҳужум уюштирилди. Бу ҳақда Украина рақамли трансформация вазири Михаил Федоров Telegram каналида маълум қилган.
«Тахминан, 16:00 да давлатимизга навбатдаги оммавий DDoS ҳужуми уюштирилди. Биздаги маълумотларга кўра бир қатор банкларда, шунингдек, Олий Рада (сайт ишлаб кетган), Вазирлар маҳкамаси ҳамда Ташқи ишлар вазирлиги веб-сайтларига киришда муаммолар кузатилган. Бу ҳужум талафотларини камайтириш мақсадида трафикни бошқа провайдерга ўтказиш ишлари билан боғлиқ жараён», — деб ёзган Федоров.
Айни вақтда Олий Рада, ҳукумат ва ТИВ сайтлари одатий тартибда фаолиятини олиб бормоқда.
Аввалроқ Украина хавфсизлик қўмитаси, Бош прокурор офиси, Қуролли кучлар, Рақамли трансформация вазирлигининг сайтлари ишламай қолганди.
Йил бошидан буён Украина ҳукумати турли идораларга бир нечта DDoS ҳужумлар уюштирилгани ҳақида хабарлар берган. 14 январда хакерлар камида 70 та давлат порталларига ҳужум қилган. Вазирлар маҳкамаси, ТИВ, Спорт вазирлиги, ҳудудларни ривожлантириш вазирлиги, Молия вазирлиги, Экология вазирлиги ва бошқа идораларнинг сайтлари ишламай қолганди. Ушбу веб-сайтларда Украина фуқароларига хакернинг мурожаати матни эълон қилинган, унда халқнинг бундан ҳам ёмонроқ ҳолатларни кутиб қўрқиб яшаши ҳақида сўз борган. Мурожаатда украиналиклар ҳақида маълумотлар умумий тармоққа юклангани айтилган. Аммо Украина хавфсизлик хизмати шахсга доир маълумотларнинг сиздирилиш ҳолатлари кузатилмаганини қайд этган.
Мавзуга доир: Хакерлар Украинадаги давлат хизматлари сервисига Ўзбекистон орқали ҳужум уюштиргани маълум қилинди
«Украиналикларнинг ҳамма нарсада Россияни айблашига кўникиб кетдик, мамлакатда ёмон об-ҳаво кузатилса ҳам биз айбдормиз», — дея Россиянинг хакерлар ҳужумига алоқадорлиги тўғрисидаги Украина айбловларига ўз изоҳини берган Путиннинг матбуот котиби Дмитрий Песков.
Изоҳ (0)