Ўзини ўзи мустақил деб эълон қилган Донецк ва Луганск халқ республикаларида содир бўлаётган воқеалар геноцид таърифига мос келмайди. Бу ҳақда БМТ бош котиби Антониу Гутерриш маълум қилди.
«Геноцид — бу аниқ таърифи бор жиноят ва бу таърифни халқаро ҳуқуққа мувофиқ қўллаш керак. Ўйлашимча, бу вазият ундай эмас», — дейди Гутерриш.
Унинг қўшимча қилишича, БМТ агарда Россия ҳарбий хизматчилари ДХР ва ЛХРга кирса, уларни тинчликпарвар деб ҳисобламайди.
«Агарда бир мамлакат қўшинлари бошқасининг ҳудудига унинг рухсатисиз кирса, бу холис тинчликпарварлик ҳисобланмайди. Улар, умуман, тинчликпарвар эмас», — дейди БМТ бош котиби. Шунингдек, у «тинчликпарварлик фаолияти тўғрисидаги тушунчаларни бузиб кўрсатилишидан» хавотирда эканини билдирган.
Гутерриш Россияни БМТ низомига тўлиқ риоя этишга чақирган: «БМТ низоми тамойиллари — бу ‘а lа cartе’ менюси эмас. Унга танлаб риоя қилинмайди. БМТга аъзо давлатлар уларнинг барчасини қабул қилган ва барчасида риоя қилиши шарт».
Россия президенти Владимир Путин 21 февраль куни Хавфсизлик кенгаши йиғилишида ДХР ва ЛХР мустақиллигини эълон қилиш таклиф этилганидан кейин, мамлакат фуқароларига мурожаат йўллади ва республикаларнинг мустақиллигини тан олиш ҳақидаги фармонни имзолади. 22 февраль куни Россия давлат думаси ва федерация кенгаши ушбу фармонни ратификация қилди.
Шундан сўнг, Байден ДХР ва ЛХР мустақиллигини тан олган Россияга қарши санкциялар эълон қилди. Шунингдек, Япония, Канада ва Австралия ДХР ва ЛХРнинг тан олиниши сабаб Россияга қарши қатор санкцияларни жорий этди.
Изоҳ (0)