Украина бош вазири Денис Шмигалнинг маълум қилишича, Украина Россия президенти Владимир Путин томонидан илгари сурилган муносабатларни нормаллаштириш шартларини бажаришни имконсиз деб билади. Бу ҳақда у ўзининг Telegram’даги каналида ёзиб қолдирган.
«Россия президенти томонидан Украинага нисбатан эълон қилинган шартларнинг бажарилиши украин жамиятининг танловига зиддир. Мустақил, суверен Украина ва мамлакатимиз бош вазири сифатида мен учун — бу имконсиз», — дейди Шмигал.
ICTV телеканали эфирида бош вазир ушбу баёнотини такрорлаган ва хотиржамликни сақлаётган украиналикларга миннатдорчилик билдирган, чунки бу иқтисодий ҳамда макроиқтисодий вазиятни барқарор сақлаш имконини беради.
22 февраль куни Владимир Путин Украина билан муносабатларни нормаллаштиришнинг бир нечта шартларини айтди. Унинг сўзларига кўра, агарда Украина ҳукумати Қримдаги референдум натижаларини тан олса, НАТОга қўшилишдан воз кечса ва мамлакатни маълум даражада қуролсизлантиришга рози бўлса, бу амалга ошади. «Биринчи навбатда қилиниши керак бўлган иш — бу Севастопол ва Қримда яшовчи одамларнинг хоҳишини тан олишдир. Ушбу хоҳиш Косовода содир бўлганидан нимаси билан ёмон? Ҳеч нимаси билан. Қарор парламент томонидан қабул қилинди, бу ерда эса умумхалқ референдум орқали», — деган Путин.
Россия президентининг сўзларига кўра, Киевнинг мустақил равишда НАТОга қўшилишни рад этиши «Ғарб давлатларидаги ҳамкасбларида юзини йўқотмаслик» имконини беради.
Эслатиб ўтамиз, Россия президенти Владимир Путин 21 февраль куни Хавфсизлик кенгаши йиғилишида ДХР ва ЛХР мустақиллигини эълон қилиш таклиф этилганидан кейин, мамлакат фуқароларига мурожаат йўллади ва республикаларнинг мустақиллигини тан олиш ҳақидаги фармонни имзолади. 22 февраль куни Россия давлат думаси ва федерация кенгаши ушбу фармонни ратификация қилди.
Шунингдек, Россия федерация кенгаши 22 февралда Путиннинг Донбасс ҳудудида мустақиллиги тан олинган республикаларга ҳарбий қўшин юборишига рухсат берди. Шундан кейин Путиннинг ўзи қўшинларни республикалар ҳудудига киритиш борасидаги якуний қарор вазиятнинг қандай ривожланишига боғлиқлигини қайд этди.
Изоҳ (0)