Япония, Канада ва Австралия ДХР ва ЛХРнинг тан олиниши сабаб Россияга қарши қатор санкцияларни жорий этди

Япония ҳукумати Россия, шунингдек, Донбасс республикаларига қарши қатор чеклов чораларини жорий этиш бўйича қарор қабул қилди. Бу ҳақда мамлакат бош вазири Фумио Кисидага таяниб, «Интерфакс» хабар берди.

У Москвани «Украина атрофидаги вазиятни тартибга солишда дипломатик қадамларга қайтишга» чақириб, ДХР ва ЛХР мустақиллигининг тан олиниши «Украина суверенитети ва ҳудудий яхлитлигини бузиш» эканини таъкидлаган.

Шу муносабат билан бош вазир «Япония санкциялар қўллаш бўйича қарор қабул қилганини» айтган. Унга кўра, Донбасс республикалари вакилларига виза бериш тўхтатилади ва уларнинг капиталлари музлатилади, мазкур республикалар билан экспорт-импорт муносабатлари, шунингдек, Россия ҳукуматининг янги суверен қарзи бўйича операциялар тақиқланади.

«Кейинчалик ушбу чора-тадбирларнинг тафсилотларини ҳал қиламиз ва зарурий тартиб-қоидаларни кечиктирмасдан амалга оширамиз», — деган бош вазир. Унинг қайд этишича, вазият ёмонлашган тақдирда, чора-тадбирлар рўйхати кенгайтирилиши мумкин.

Бундан ташқари, Канада ва Австралия ҳукуматлари ҳам Россияга қарши санкцияларни жорий этган. Канада бош вазири Жастин Трюдо иқтисодий санкцияларнинг «биринчи раунди» ҳақида эълон қилган. Чекловлар ДХР ва ЛХР мустақиллигини тан олишни қўллаб-қувватлаган депутатларга тааллуқли. Шунингдек, канадаликларга ушбу республикалар билан молиявий операцияларни ўтказиш тақиқланади.

«Тан олиш (ДХР ва ЛХР мустақиллигини — таҳр.) Россиянинг БМТ низоми бўйича мажбуриятларини бузиш ҳисобланади», — дейди Трюдо.

Россиянинг Оттавадаги элчиси Олег Степановнинг сўзларига кўра, Канада ҳукуматининг қарори «Россиянинг Донбассда тинчликни таъминлашга қаратилган сиёсати ва амалий йўналиши»га таъсир кўрсатмайди.

Австралия бош вазири Скотт Моррисоннинг маълум қилишича, мамлакат бир қатор россиялик жисмоний шахсларга қарши санкциялар қўлланади. «Даставвал биз Россия Хавфсизлик кенгашининг саккиз аъзосини мамлакатга киришини тақиқлаш ва мақсадли молиявий санкцияларни жорий этамиз», — дея аниқлик киритган Моррисон.

Шу билан бирга, ҳукумат «Қрим ва Севастополга қарши» амалдаги санкцияларни кенгайтиради: эндиликда улар «Донецк ва Луганск ҳудудларига» ҳам тааллуқли.

Аввалроқ ЕИ мамлакатлари Россияга қарши санкцияларни келишиб олгани, қора рўйхатга Давлат думасининг ЛХР ва ДХР мустақиллигини ёқлаб овоз берган 351 нафар депутати киритилгани, Байден ДХР ва ЛХР мустақиллигини тан олган Россияга қарши санкциялар эълон қилгани тўғрисида хабар берилганди.