Қирғизистон президенти Донецк ва Луганск халқ республикаларининг тан олинишига муносабат билдирди

У ёки бу давлатни тан олиш ҳар қандай давлатнинг суверен ҳуқуқидир, деди Қирғизистон президенти Садир Жапаров Россия томонидан Донецк ва Луганск халқ республикаларининг тан олинишига изоҳ берар экан.

Жапаровнинг сўзларига кўра, у Украина шарқидаги вазият ривожини «ташвиш ва чуқур хавотир» билан кузатмоқда.

«Менга Донбасс атрофидаги вазиятнинг қандай ривожланаётгани ҳақида доимий равишда хабар бериб турилади. Қирғизистон ҳар доим Минск келишувларига риоя қилиш заруратидан келиб чиққан. Ушбу келишув қарама-қаршиликларни ҳал қилиш бўйича Бирлашган Миллатлар Ташкилотининг Хавфсизлик Кенгаши томонидан қўллаб-қувватланган ягона ҳужжатдир. Афсуски, унга риоя қилмаслик ҳозирги қийин вазиятга олиб келди», — деб ёзган Жапаров Facebook’да.

У инсонларнинг қурбон бўлишига йўл қўймаслик учун вазиятни фақат тинч дипломатик йўллар билан, музокаралар столида ҳал қилиш зарурлигига ишонч билдирди.

«Инсон ҳаёти Ер юзидаги энг қимматли нарса. Мен сизни можаронинг янада авж олишига йўл қўймаслик учун вазиятни ҳал қилишда максимал даражада эҳтиёткорлик ва вазминлик кўрсатишга чақираман. Балки бу (тан олиш) кўплаб Россия фуқаролари яшайдиган Донбасснинг тинч аҳолисини ҳимоя қилиш учун мажбурий чора бўлгандир. Қайд этишни истардимки, у ёки бу давлатни тан олиш ҳар қандай давлатнинг суверен ҳуқуқидир», — деди Жапаров.

Россия президенти Владимир Путин 21 февраль куни Хавфсизлик кенгаши йиғилишида ДХР ва ЛХР мустақиллигини эълон қилиш таклиф этилганидан кейин, мамлакат фуқароларига мурожаат йўллади ва республикаларнинг мустақиллигини тан олиш ҳақидаги фармонни имзолади. 22 февралда Донбассдаги республикаларнинг парламентлари, Россия давлат думаси ва федерация кенгаши ушбу ҳужжатларни ратификация қилди.

Аксарият хорижий етакчилар Путиннинг қарорига салбий муносабат билдирди. Қозоғистон ташқи ишлар вазири Мухтор Тловберди республикаларни тан олиш эҳтимолини рад этди. «Сизни ишонтириб айтишим керакки, Қозоғистон томонидан Луганск ва Донецк халқ республикаларини тан олиш ҳақида гап йўқ. Биз халқаро ҳуқуқ асосларидан ва БМТ низомининг асосий тамойилларидан келиб чиқамиз», — деди у журналистлар билан суҳбатда.

Шу билан бирга, Сурия, ўзлари қисман тан олинган давлатлар бўлган Жанубий Осетия ва Абхазия Россиянинг ЛХР ва ДХР бўйича қарорини қўллаб-қувватлашини билдирди.