Фарзанд ота-она қувончи, авлодлар давомчисидир. Оилада қанча ўғил-қиз бўлишидан қатъи назар, яқинлар учун ҳар бирининг ўз ўрни бор. Аммо бир қанча фарзанднинг барчасини кўнглига бирдек қараб, тарбиялаш ва камолга етказиш осон эмас. «Дарё» ўзбек санъаткорлари орасида серфарзанд машҳурларни бир саҳифага жамлади.
Рашид Холиқов
Ўзбекистонда хизмат кўрсатган артист Рашид Холиқов 1994 йили Саидахон исмли қиз билан оила қурган. Бугунги кунда жуфтликнинг Санжар, Ислом, Темур ва Азизахон исмли тўрт нафар фарзанди бор.
Рашид Холиқов тўнғич ўғиллари Санжар ва Исломни уйлантирган, икки нафар набираси бор. Санжар отасининг изидан бориб, ўнлаб тароналари билан ўз мухлисларини топган.
Нилуфар Усмонова
17 ёшида ҳуқуқшунос йигитга турмушга чиққан Нилуфар Усмонова 2004 йилда илк бор оналик бахтига эришган. У тўнғич фарзанди Саидаъзамхонни дунёга келтиргач, бир йилдан сўнг ёш оилага дарз кетади. 2009 йили яна оила қуришга қарор қилган хонанда иккинчи умр йўлдошидан Иброҳимхон ва Сулаймонхон исмли ўғиллар кўради.
Шахсий ҳаёти, асосан, турмуш ўртоғи билан боғлиқ саволларни четлаб ўтувчи Нилуфар Усмонова 2017 йилда катта қизи Саъдияни, 2018 йилнинг августида эса бешинчи фарзанди Сафияни дунёга келтирган.
У интервьюларининг бирида етти нафар фарзанднинг онаси бўлиш орзуси борлигини таъкидлаган эди.
Жаҳонгир Позилжонов
2008 йилда бўйдоқлар сафини тарк этган «Божалар» гуруҳи яккахони Жаҳонгир Позилжонов ҳам серфарзанд хонандалардан бири ҳисобланади.
«Бойвачча» фильмининг суратга олиш жараёнида танишган Жаҳонгир Позилжонов ва Дилдорахоннинг икки ўғил ҳамда уч қизи бор. Хонанда тўнғич ўғлига Ғайратжон, дея отасининг исмини, яна бирига эса марҳум дўсти Мўмин Ориповнинг исмини қўйган.
Валижон Шамсиев
Таниқли сўз устаси Валижон Шамсиевнинг икки ўғил ва тўрт қизи бор. Ўзбекистон халқ артисти Эркин Комиловнинг неваралари бўлган олти фарзанднинг барчасида санъатга қизиқиш катта.
Оиланинг тўнғичи Муштарийбону турмушга чиққан бўлиб, у умр йўлдоши билан Лайли ва Мажнун жуфтлигида қўшиқ куйлайди.
Муҳаммаджон Бобожонов
Асосан комедик жанрдаги роллари билан танилган актёр Муҳаммаджон Бобожонов ўзбек шоу-бизнесида энг серфарзанд оталардан ҳисобланади.
Чунки унинг олти нафар қизи ва бир ўғли бор. Тўнғич қизи 2021 йилда Ўзбекистон давлат жаҳон тиллари университетини тамомлаган.
Ҳамид Тошпўлатов
«Меҳмонжонлардан айланай» сериалидаги роли орқали кўпчиликка яхши таниш актёр, Ўзбекистонда хизмат кўрсатган артист Ҳамид Тошпўлатовнинг ўзи ҳам серфарзанд оилада туғилган. У ўн икки нафар фарзанднинг бири ҳисобланади.
65 ёшли актёрнинг беш қиз ва икки ўғил фарзанди, кўплаб неваралари бор.
Одина Ғозиева
Ўзбекистон халқ артисти Одина Ғозиева олий ўқув юртини тамомлагач, курсдоши Саъдулла Нарзуллаевга турмушга чиқади.
Икки ҳамкасб ҳам ижодда, ҳам оилада бир-бирини қўллаб-қувватлаб, узоқ йиллар бахтли ҳаёт кечирган. Улар беш қиз ва бир ўғил ҳамда ўнлаб набираларни вояга етказган.
Саъдулла Нарзуллаев 2009 йилда юрак хуружи туфайли вафот этган. Одина Ғозиева ҳозирда Муқимий номидаги мусиқали драма ва комедия театрида ижод қилмоқда.
Жаҳонгир Отажонов
Хонанда Жаҳонгир Отажоновнинг етти нафар фарзанди борлигини кўпчилик билмаса керак. Аммо бу ҳақда унинг ўзи Instagram саҳифаси орқали бир неча марта маълум қилган ва ўғил-қизлари билан тушган суратларини тармоқларга тез-тез жойлаб туради.
Қўшиқчининг Мумтоза, Муаммар, Муҳаммад, Муайяд, Ясира, Ясмина, Лийнат исмли фарзандлари бор.
Эркин Комилов
Ўзбекистон халқ артисти Эркин Комилов умри давомида уч марта оила қурган. Икки аёли ҳаётдан эрта кўз юмган. Унинг уч турмушидан беш қиз ва икки ўғил фарзанди бор.
76 ёшли устоз санъаткор ҳозирда Маҳбубахон исмли турмуш ўртоғи билан бирга яшайди. Уларнинг ўндан зиёд набира ва чеваралари бор.
Йигитали Мамажонов
32 ёшли киноактёр Йигитали Мамажонов беш фарзанднинг отаси ҳисобланади. Унинг хонанда Райҳон билан никоҳидан Ислом ва Имрон исмли эгизак ўғиллари, иккинчи турмуши Нигина исмли аёлдан қизи бор.
2018 йили актриса Муқаддас Саъдуллаевага уйланганини оммага маълум қилган Йигитали Мамажоновнинг учинчи турмушидан Абубакр ва Ҳадижа исмли фарзандлар дунёга келган. У ҳозирда Муқаддас Саъдуллаева билан бахтли турмуш кечирмоқда.
Изоҳ (0)