Farzand ota-ona quvonchi, avlodlar davomchisidir. Oilada qancha o‘g‘il-qiz bo‘lishidan qat’i nazar, yaqinlar uchun har birining o‘z o‘rni bor. Ammo bir qancha farzandning barchasini ko‘ngliga birdek qarab, tarbiyalash va kamolga yetkazish oson emas. “Daryo” o‘zbek san’atkorlari orasida serfarzand mashhurlarni bir sahifaga jamladi.
Rashid Xoliqov
O‘zbekistonda xizmat ko‘rsatgan artist Rashid Xoliqov 1994-yili Saidaxon ismli qiz bilan oila qurgan. Bugungi kunda juftlikning Sanjar, Islom, Temur va Azizaxon ismli to‘rt nafar farzandi bor.
Rashid Xoliqov to‘ng‘ich o‘g‘illari Sanjar va Islomni uylantirgan, ikki nafar nabirasi bor. Sanjar otasining izidan borib, o‘nlab taronalari bilan o‘z muxlislarini topgan.
Nilufar Usmonova
17 yoshida huquqshunos yigitga turmushga chiqqan Nilufar Usmonova 2004-yilda ilk bor onalik baxtiga erishgan. U to‘ng‘ich farzandi Saida’zamxonni dunyoga keltirgach, bir yildan so‘ng yosh oilaga darz ketadi. 2009-yili yana oila qurishga qaror qilgan xonanda ikkinchi umr yo‘ldoshidan Ibrohimxon va Sulaymonxon ismli o‘g‘illar ko‘radi.
Shaxsiy hayoti, asosan, turmush o‘rtog‘i bilan bog‘liq savollarni chetlab o‘tuvchi Nilufar Usmonova 2017-yilda katta qizi Sa’diyani, 2018-yilning avgustida esa beshinchi farzandi Safiyani dunyoga keltirgan.
U intervyularining birida yetti nafar farzandning onasi bo‘lish orzusi borligini ta’kidlagan edi.
Jahongir Poziljonov
2008-yilda bo‘ydoqlar safini tark etgan “Bojalar” guruhi yakkaxoni Jahongir Poziljonov ham serfarzand xonandalardan biri hisoblanadi.
“Boyvachcha” filmining suratga olish jarayonida tanishgan Jahongir Poziljonov va Dildoraxonning ikki o‘g‘il hamda uch qizi bor. Xonanda to‘ng‘ich o‘g‘liga G‘ayratjon, deya otasining ismini, yana biriga esa marhum do‘sti Mo‘min Oripovning ismini qo‘ygan.
Valijon Shamsiyev
Taniqli so‘z ustasi Valijon Shamsiyevning ikki o‘g‘il va to‘rt qizi bor. O‘zbekiston xalq artisti Erkin Komilovning nevaralari bo‘lgan olti farzandning barchasida san’atga qiziqish katta.
Oilaning to‘ng‘ichi Mushtariybonu turmushga chiqqan bo‘lib, u umr yo‘ldoshi bilan Layli va Majnun juftligida qo‘shiq kuylaydi.
Muhammadjon Bobojonov
Asosan komedik janrdagi rollari bilan tanilgan aktyor Muhammadjon Bobojonov o‘zbek shou-biznesida eng serfarzand otalardan hisoblanadi.
Chunki uning olti nafar qizi va bir o‘g‘li bor. To‘ng‘ich qizi 2021-yilda O‘zbekiston davlat jahon tillari universitetini tamomlagan.
Hamid Toshpo‘latov
“Mehmonjonlardan aylanay” serialidagi roli orqali ko‘pchilikka yaxshi tanish aktyor, O‘zbekistonda xizmat ko‘rsatgan artist Hamid Toshpo‘latovning o‘zi ham serfarzand oilada tug‘ilgan. U o‘n ikki nafar farzandning biri hisoblanadi.
65 yoshli aktyorning besh qiz va ikki o‘g‘il farzandi, ko‘plab nevaralari bor.
Odina G‘oziyeva
O‘zbekiston xalq artisti Odina G‘oziyeva oliy o‘quv yurtini tamomlagach, kursdoshi Sa’dulla Narzullayevga turmushga chiqadi.
Ikki hamkasb ham ijodda, ham oilada bir-birini qo‘llab-quvvatlab, uzoq yillar baxtli hayot kechirgan. Ular besh qiz va bir o‘g‘il hamda o‘nlab nabiralarni voyaga yetkazgan.
Sa’dulla Narzullayev 2009-yilda yurak xuruji tufayli vafot etgan. Odina G‘oziyeva hozirda Muqimiy nomidagi musiqali drama va komediya teatrida ijod qilmoqda.
Jahongir Otajonov
Xonanda Jahongir Otajonovning yetti nafar farzandi borligini ko‘pchilik bilmasa kerak. Ammo bu haqda uning o‘zi Instagram sahifasi orqali bir necha marta ma’lum qilgan va o‘g‘il-qizlari bilan tushgan suratlarini tarmoqlarga tez-tez joylab turadi.
Qo‘shiqchining Mumtoza, Muammar, Muhammad, Muayyad, Yasira, Yasmina, Liynat ismli farzandlari bor.
Erkin Komilov
O‘zbekiston xalq artisti Erkin Komilov umri davomida uch marta oila qurgan. Ikki ayoli hayotdan erta ko‘z yumgan. Uning uch turmushidan besh qiz va ikki o‘g‘il farzandi bor.
76 yoshli ustoz san’atkor hozirda Mahbubaxon ismli turmush o‘rtog‘i bilan birga yashaydi. Ularning o‘ndan ziyod nabira va chevaralari bor.
Yigitali Mamajonov
32 yoshli kinoaktyor Yigitali Mamajonov besh farzandning otasi hisoblanadi. Uning xonanda Rayhon bilan nikohidan Islom va Imron ismli egizak o‘g‘illari, ikkinchi turmushi Nigina ismli ayoldan qizi bor.
2018-yili aktrisa Muqaddas Sa’dullayevaga uylanganini ommaga ma’lum qilgan Yigitali Mamajonovning uchinchi turmushidan Abubakr va Hadija ismli farzandlar dunyoga kelgan. U hozirda Muqaddas Sa’dullayeva bilan baxtli turmush kechirmoqda.
Izoh (0)