200 доллардан 700 долларгача: Ўзбекистонда ота-она ёки фарзандларга бағишланган қўшиқларни оилавий тадбирларда ижро этиш нархи қанча?

Кейинги пайтларда ота-онаси, фарзанди ёки яқинларининг таваллуд кунлари муносабати билан уларнинг севимли хонандаларини уйга таклиф этиб, махсус қўшиқ орқали табриклаш урфга айланди. Бу янги анъана «Бу менинг онам» кўрсатуви ва хонанда Малика Равшанованинг шу номдаги қўшиғи туфайли оммалашди. Хўш, таниқли санъаткорларнинг мухлислар хонадонига ташриф буюриб, уларга ёқимли сюрпризни тақдим этиши қанчага тушмоқда?

Малика Равшанова «Бу менинг онам»

Хонанда Малика Равшанова ижодини бошлагандан буён «Бу менинг онам» қўшиғи билан халқ хизматларига боради. Қўшиқ омадли чиққач, хонанда рэпертуари «Дадажон» қўшиғи билан бойиди. Хонанда маъмурининг маълумотига кўра, у табрик тадбирига 500 АҚШ долларидан камига бормайди. Тунги табрик хизматига талаб юқори бўлгани учун хонандани аввалдан банд қилиб қўйиш керак.

Малика Равшанованинг хизматидан ўзбек шоу-бизнесининг таниқли вакиллари ҳам фойдаланиб туради.

Дилдора Ниёзова «Онагинам»

Хонанда Дилдора Ниёзова ҳам «Онагинам» қўшиғи билан хонадонингизга ташриф буюриши ва онажонингизни хурсанд қилиши мумкин. Бу хизмат нархи 500 АҚШ долларини ташкил этади. Хонанда ярим тунда хонадонингизга ташриф буюриб, онангизга гулдаста тақдим этади ва рэпертуаридаги она ҳақидаги иккита қўшиқни ижро этади.

Ойбек ва Нигора «Ширинтойим»

Ижодкор жуфтлик, асосан, болалар билан боғлиқ тадбирларда  иштирок этишади. «Ширинтойим» ва «Қизим» тароналари сабаб уларни кўпроқ чақалоқларни кутиб олиш маросимларига таклиф этишади. Ойбек ва Нигоранинг битта тадбирда иштирок этиши 400 долларга нархланади. Бу маблағни тўласангиз, 8-10 та қўшиқни ижро этиб, тадбирга янада файз бағишлашади.

Дилсўз «Отажон» 

Келин кузатиш маросимида фаол иштирок этадиган хонанда Дилсўз «Отажон» қўшиғи билан кўплаб ёшларнинг қувончига шерик бўлган. Хонанда маъмури Ўткир Қодировнинг маълум қилишича, хонанда келин кузатиш тадбирларида 700 АҚШ долларидан камига бормайди.

Музаффар Абдуазимов «Онам, касалман деманг»

«Онам, касалман деманг» қўшиғи билан кўплаб мухлисларнинг кўнглидан жой олган хонанда туғилган кунга 200 АҚШ доллари эвазига ташриф буюради. Одатда хонанда бундай тадбирларда битта ёки иккита қўшиқ ижро этади холос.

Темур Раҳмонов «Қизалоғим»

Хонанда Темур Раҳмоновнинг  «Қизалоғим» қўшиғи билан оилавий тадбирингизга ташриф буюриши 300 АҚШ долларига тушади. Хонанда бу ҳақ эвазига олтита қўшиқ ижро этиб, тадбирнинг янада кўтаринки руҳда ўтишига ҳисса қўшади.

Шерзодбек «Онажон»

Ёш хонанда Шерзодбек ҳам таваллуд кунлар муносабати билан ўтказиладиган тадбирларда фаол. Фақат у бошқалардан фарқли равишда «Онажон» қўшиғини жонли ижрода, фақатгина гитара жўрлигида ижро этади. Унинг хизмат ҳаққи 200 АҚШ долларини ташкил этади.