Нурсултон Рўзибоевнинг навбатдаги жанги санаси ва рақиби номи маълум бўлди

Ўзбекистонлик MMA жангчиси Нурсултон Рўзибоев (34-9-2) Баҳрайндаги жанг кечасида октагонга чиқади.

11 март куни бўлиб ўтиши режалаштирилаётган Brave CF 57 турнирида ўзбекистонлик спортчига бразилиялик Луис Филипе Диас (15-3) рақиблик қилади.

Қайд этиш жоиз, Рўзибоев 20 февраль санасида Оcтагон ва U1 промоушенлари ҳамкорлигида Тошкентда ўтган MMA кечасида бразилиялик Лучиано Континини (14-5) 1-раунндаёқ таслим этганди.

Луис Филипе Диаснинг сўнгги жанги 2020 йил 23 август куни бразилиялик Ванильто Антунесга қарши бўлиб ўтган. Диас 1-раунддаёқ рақиби устидан ғалаба қозонган.

Эслатиб ўтамиз, Нурсултон Рўзибоев 2021 йил февралида штаб-квартираси Баҳрайнда жойлашган Brave CF промоушени билан шартнома имзолаганди.