Тошкентнинг Чилонзор туманида турли формулалар билан деворга чизилган Алберт Эйнштейннинг портрети бўяб ташланди.
Inkuzart тахаллуси билан ижод қилаётган кўча рассоми Эйнштейннинг қўл қовуштириб турган ҳолати ва унинг икки тарафида жуда кўплаб формулалари бор стрит-арт 2020 йилнинг августида Чилонзор тумани 2-даҳаси 103-мактаб рўпарасига чизган эди. Рустам Ҳусанов исмли туроператор ўзининг Facebook’даги саҳифасига «уни болалар, аҳоли яхши кўрарди, унга экскурсиялар уюштирилади», дея ёзиб қолдирган. Унинг таъкидлашича, олдинлари ушбу деворга ҳақоратли сўзлар ёзилган бўлган.
Inkuzart ўзининг Telegram’даги каналига «Ералаш» юмористик киножурналининг мусиқасидан фойдаланилган роликни жойлаган бўлиб, унда рассом граффитини чизгани, кейин эса ишчилар деворни бўйлаб ташлагани тасвирланган. «Чилонзор ҳокимига раҳмат», — дейилади видео изоҳида.
«Gazeta.uz»нинг Чилонзор ҳокимлигига таяниб хабар беришича, бино ноқонуний қурилган иншоот бўлгани сабаб бузилиши кераклиги учун стрит-арт ўчирилган. Туман ҳокимининг архитектура, қурилиш ва коммуникацияларни ривожлантириш масалалари бўйича ўринбосари Аброр Аҳмедовнинг сўзларига кўра, сурат муаллифига «бошқа бир қулай жой» таклиф этилади.
Telegramдаги «Kurbanoff.net» канали ушбу ҳолатга муносабат билдириб «Нима граффити чизилган ноқонуний иншоотларни бузиш тақиқланганми? Агар бинони бузиш керак бўлса нега граффити ўчирилди, бирга бузиб ташласа ҳам бўлади-ку?», дея савол қолдирган.
Эслатиб ўтамиз, 2021 йилнинг сентябрь бошида @inkuzart Ўзбекистон автомобиль бозоридаги монополияга бағишланган стрит-арт чизганди. Унда машина учун узун навбат ва навбат бошида қизил шапкали инсон тасвирланганди. Кейинроқ ушбу тасвир тўлиқ ўчириб ташланган, пойтахт ҳокимлиги ва «Ўзавтосаноат» бу ишга алоқаси йўқлигини маълум қилган эди. Ноябрда эса кўча рассомининг Тошкентда бензин нархи ошишига бағишланган стрит-арт ўчириб ташланганди.
Изоҳ (0)