Саудия Арабистонида мамлакат тарихида биринчи марта 30 нафар аёлни машинист сифатида ишга йўллаш тўғрисида вакансия эълон қилинганди. Эълон бўйича 28 мингдан ортиқ ариза келиб тушди. Бу ҳақда Макка ва Мадина ўртасида тезюрар поездлар ҳаракати учун масъул бўлган Испаниянинг Renfe темир йўл компанияси хабар берди.
Компания бир ой ичида жуда кўплаб аризаларни қабул қилди. Академик фаолияти ва инглиз тилини билиш даражасини баҳоловчи онлайн тест синовларидан сўнг номзодлар сони икки бараварга қисқариб, 14 минг кишига тушган.
Март ойининг ўрталарига қадар компания 30 нафар номзодни саралаб олади. Бир йиллик тренингдан сўнг аёллар Макка ва Мадина ўртасида ҳар йили миллионлаб мусулмон зиёратчиларни ташийдиган поездларни бошқаради.
Al-Jazeera хабарига кўра, яқин вақтгача саудиялик аёллар ўқитувчи ёки тиббиёт ходими бўлиб ишлаши мумкин эди. Сўнгги йилларда ҳукумат қатор ислоҳотларни амалга оширди, бунинг натижасида 2020 йил охирига келиб мамлакатдаги барча меҳнаткашлар орасида аёллар салмоғи 33 фоизгача ошди. Шунга қарамай, эркаклар, айниқса, давлат секторида кўпчилик лавозимларни эгаллаб турибди.
Сўнгги йилларда Саудия Арабистони аёлларга эркак васийлар қарамоғисиз яшаш, машина ҳайдаш, эркаклар рухсатисиз хорижга чиқиш, футбол ўйинларига бориш, армияда хизмат қилиш имконини берди. Аммо катта ижтимоий ислоҳотларга қарамай, саудиялик аёллар эркак васийнинг рухсатисиз турмушга чиқа олмайди, қамоқдан озод этилмайди ёки муайян тиббий хизматлардан фойдалана олмайди, деб ёзади BBC News.
Изоҳ (0)