«Толибон» ўз армиясидаги ҳарбийлар сонини 150 минг кишига етказишга қарор қилди

Афғонистонда 2021 йилнинг августида ҳокимият тепасига келган «Толибон» ҳаракати ўз армиясини 150 минг кишига етказмоқчи. Бу ҳақда толиблар мудофаа вазирининг матбуот котиби Иноятулло Хоразмий Bakhtar ахборот агентлигига берган интервьюсида маълум қилди.

Унга кўра, янги қуролли кучларни шакллантиришда Мудофаа вазирлиги жанговар тажрибага эга, жумладан, аввалги ҳукумат даврида хизмат қилган ҳарбий хизматчиларни сафарбар қилишни режалаштирмоқда. «Бундай тузилмани яратиш учун профессионал кадрлар керак ва миллий Мудофаа вазирлиги янги армияга жанговар тажрибага эга офицерларни жалб қилади», — дейди Хоразмий.

Мудофаа вазирлиги вакили бўлажак армиянинг техник жиҳозланиши ҳақида гапирар экан, «Толибон» «қатор қўшни давлатлар билан» ҳарбий техника етказиб бериш бўйича музокаралар олиб бораётганини таъкидлаган.

Аввалроқ «Толибон» мамлакат армияси 100 минг кишилик бўлишини маълум қилганди. Агарда «Толибон» қуролли кучлари 150 минг кишига етказилса, у Марказий Осиё республикалари орасида энг кўп сонли армияга айланади.

Глобал Firepower маълумотларига кўра, Ўзбекистонда ҳарбий хизматчиларнинг умумий сони 65 минг нафарни (Жаҳон банкининг 2018 йилдаги маълумотларига кўра — 68 минг нафар) ташкил этади. Солиштириш учун: Қозоғистонда — 77 минг, Қирғизистонда — 22 минг, Тожикистонда — 15 минг ҳарбий хизматчи мавжуд.

Хоразмий, шунингдек, ўз интервьюсида ҳарбийларнинг ахлоқий ҳолатини назорат қилувчи Тозалаш комиссия ҳозирга қадар «Толибон»нинг 4202 нафар вакилини ҳаракат сафидан чиқарганини маълум қилган.

Тозалаш комиссияси «Толибон» томонидан 2021 йилнинг ноябрида тузилган. Ҳаракат шу тариқа афғонистонликларнинг «Толибон» жангариларининг репрессиялари ва ўзбошимчаликлари ҳақидаги кўплаб шикоят ва хабарларига жавоб қайтарган. Ушбу комиссия ҳаракатнинг марҳум асосчиси мулла Умарнинг ўғли мулла Муҳаммад Ёқуб бошчилигидаги «Толибон» Мудофаа вазирлигига бўйсунади. Унинг асосий вазифаси сафда ўз ҳаракатлари билан толибларни «ёмонотлиқ қилаётган» шахсларни аниқлашдан иборат.