Rossiya G‘arbiy harbiy okrugining tank armiyasi bo‘linmalari va moddiy-texnik ta’minot brigadalari mashg‘ulotlar tugagandan so‘ng doimiy joylashish punktlariga yo‘l oldi. Bu haqda Rossiya Mudofaa vazirligiga tayanib, Meduza xabar berdi.
Vazirlik ko‘p sonli zirhli texnikalar bilan jo‘nab ketayotgan temiryo‘l eshelonining videotasvirlarini e’lon qildi. Kadrlardan harbiy karvonning kechasi qorli hududda ketayotganini ko‘rish mumkin.
Rossiya Mudofaa vazirligi bayonotida harbiylar aynan qaysi hududdan qaytayotgani aytilmagan. Faqatgina tank uskunalari ming kilometrga yaqin masofadan tashilayotgani ta’kidlangan.
“Moddiy-texnik ta’minot brigadasining harbiylari rejalashtirilgan mashg‘ulotlarni o‘tkazish uchun bo‘lib turgan poligondan doimiy joylashish nuqtasigacha qariyb 900 kilometr masofani bosib o‘tdi”, — deyiladi Mudofaa vazirligi xabarida.
Bir kun avval vazirlik Janubiy harbiy okrug qo‘shinlarining Qrimdagi mashg‘ulotlari yakunlangani haqida ham xabar bergandi.
Ayni paytda AQSh Davlat departamenti matbuot kotibi Ned Praysning aytishicha, Mudofaa vazirligining armiya mashg‘ulotlardan qaytishi haqidagi videosi e’lon qilinganiga qaramay, Rossiya nafaqat Ukraina atrofidagi vaziyatni yumshatmayapti, balki Ukraina bilan chegarada qo‘shin to‘plashda davom etmoqda.
Davlat departamenti hisob-kitoblariga ko‘ra, Moskva chegaralarda allaqachon 150 mingdan ortiq askar to‘plagan, so‘nggi kunlarda ularning soni yana 7 mingga oshgan.
Kuzdan beri G‘arb davlatlari Rossiya qo‘shinlarining Ukraina bilan chegaralarda to‘planishi va Moskvaning qo‘shni davlatga bostirib kirishi mumkinligi haqida gapirmoqda. Hujumning norasmiy sanalaridan biri deb 16-fevral aytilgandi. Moskva o‘z qo‘shinlarining harakatini mashqlar bilan izohlamoqda va hech qanday hujum niyati yo‘qligini aytmoqda. Ukraina bilan bog‘liq keskinliklar fonida Kreml AQSh va NATO bilan Yevropada xavfsizlik kafolatlari bo‘yicha muzokaralar boshladi.
Izoh (0)