Ўзбекистон йўлларида содир бўлган бахтсиз ҳодисалар тафсилотларини тақдим этамиз.
Наманганда Nexia ва «Жигули» тўқнашуви оқибатида 2 киши жароҳатланди
2022 йил 17 февраль куни соат 09:30 лар атрофида Наманган–Косонсой 4Р-112 автомобиль йўлининг 5-километрида фуқаро (1993 йилда туғилган) Nexia автомобилини Наманган—Косонсой йўналиши томон бошқариб кетаётиб, ҳаракат хавфсизлигини таъминлай олмай, қувиб ўтиш қоидасини бузган. Шу сабаб қарама-қарши йўлдан келаётган фуқаро (1996 йилда туғилган) бошқарувида бўлган «ВАЗ-2106» автомашинаси билан тўқнашув содир этган.
Оқибатда Nexia автомобили ҳайдовчиси ўнг тизза қопқоғи синиши ташхиси билан, «ВАЗ-2106» ҳайдовчиси эса чап болдир суягининг ёпиқ синиши ташхиси билан шифохонага ётқизилган.
Шунингдек, «ВАЗ-2106» салонида бўлган йўловчи бош мия чайқалиши ташхиси билан шифохонага ётқизилган.
Ҳозирда ҳолат юзасидан Наманган шаҳар ИИО ФМБ ҳузуридаги ТБ томонидан суриштирув ишлари олиб борилмоқда.
Самарқандда Cobalt қарама-қарши тарафдан келаётган Mercedes билан тўқнашди
2022 йил 17 февраль куни соат 01:45 да Самарқанд шаҳар Мирзо Улуғбек кўчасида Cobalt ҳайдовчиси тезликни белгиланган меъёридан ошириши оқибатида рул бошқарувини йўқотиб, йўл ўртасидаги ажратувчи бетон тўсиқнинг устидан ўтиб кетган.
Шундан сўнг қарама-қарши томондан ўз йўналиши бўйлаб ҳаракатланиб кетаётган Mercedes-Benz-320 автомашина билан тўқнашиб, йўл-транспорт ҳодисаси содир этган.
Оқибатда иккала автомашина ҳайдовчилари тан жароҳатлари билан Самарқанд вилояти РШТЁИМ филиалига ётқизилган.
Ҳодиса юзасидан терговга қадар текширув ҳаракатлари олиб борилмоқда.
Наманганда «ВАЗ-2107» ва Nexia иштирокида ЙТҲ содир бўлди
2022 йил 17 февраль куни соат 02:00 ларда Наманган шаҳри А.Навоий кўчасида ҳайдовчи Д.М. (1998 йилда туғилган) бошқарувидаги «ВАЗ-2107» ҳамда ҳайдовчи Р.М. (1983 йилда туғилган) бошқарувида бўлган Nexia автомобиллари иштирокида тўқнашув содир бўлган.
Ҳодиса оқибатида тан жароҳати олганлар йўқ. Транспорт воситаларига техник шикаст етган.
Мазкур ЙТҲ юзасидан Наманган шаҳар ИИБ ҳузуридаги ТБ томонидан суриштирув ҳаракатлари олиб борилмоқда.
Наманганда қизил чироқда ўтиб кетган Isuzu Damas билан тўқнашди
2022 йил 17 февраль куни соат 02:00 ларда 4Р112 Фарғона ҳалқа автомобиль йўлининг 6-километридаги чорраҳада Қашқадарё вилоятида яшовчи фуқаро (2000 йилда туғилган) Isuzu автомашинасини тегишли ҳужжатлар билан Наманган–Тошкент йўналиши бўйлаб бошқариб бораётиб, чорраҳада светофорнинг тақиқловчи қизил чироғида ўтиб кетган.
У ҳаракат хавфсизлигини таъминлай олмасдан, чорраҳани кесиб ўтаётган Наманган вилоятида яшовчи фуқаро (1990 йилда туғилган) бошқарувида бўлган Damas автомашинасига бориб урилиб, йўл-транспорт ҳодисаси содир этган.
Оқибатда Damas йўлнинг чап томонига чиқиб ағдарилиб кетган.
Ҳодиса оқибатида Damas’да бўлган икки нафар йўловчи вафот этган. Ҳайдовчи ва бир йўловчи тан жароҳати олган. Isuzu ҳайдовчиси ва ундаги йўловчи ҳам шифохонага ётқизилган.
Ҳозирда мазкур ҳолат бўйича туман ИИБ ҳузуридаги ТБ томонидан терговга қадар текширув ҳаракатлари олиб борилмоқда.
Изоҳ (0)