O‘zbekiston yo‘llarida sodir bo‘lgan baxtsiz hodisalar tafsilotlarini taqdim etamiz.
Namanganda Nexia va “Jiguli” to‘qnashuvi oqibatida 2 kishi jarohatlandi
2022-yil 17-fevral kuni soat 09:30 lar atrofida Namangan–Kosonsoy 4R-112 avtomobil yo‘lining 5-kilometrida fuqaro (1993-yilda tug‘ilgan) Nexia avtomobilini Namangan—Kosonsoy yo‘nalishi tomon boshqarib ketayotib, harakat xavfsizligini ta’minlay olmay, quvib o‘tish qoidasini buzgan. Shu sabab qarama-qarshi yo‘ldan kelayotgan fuqaro (1996-yilda tug‘ilgan) boshqaruvida bo‘lgan “VAZ-2106” avtomashinasi bilan to‘qnashuv sodir etgan.
Oqibatda Nexia avtomobili haydovchisi o‘ng tizza qopqog‘i sinishi tashxisi bilan, “VAZ-2106” haydovchisi esa chap boldir suyagining yopiq sinishi tashxisi bilan shifoxonaga yotqizilgan.
Shuningdek, “VAZ-2106” salonida bo‘lgan yo‘lovchi bosh miya chayqalishi tashxisi bilan shifoxonaga yotqizilgan.
Hozirda holat yuzasidan Namangan shahar IIO FMB huzuridagi TB tomonidan surishtiruv ishlari olib borilmoqda.
Samarqandda Cobalt qarama-qarshi tarafdan kelayotgan Mercedes bilan to‘qnashdi
2022-yil 17-fevral kuni soat 01:45 da Samarqand shahar Mirzo Ulug‘bek ko‘chasida Cobalt haydovchisi tezlikni belgilangan me’yoridan oshirishi oqibatida rul boshqaruvini yo‘qotib, yo‘l o‘rtasidagi ajratuvchi beton to‘siqning ustidan o‘tib ketgan.
Shundan so‘ng qarama-qarshi tomondan o‘z yo‘nalishi bo‘ylab harakatlanib ketayotgan Mercedes-Benz-320 avtomashina bilan to‘qnashib, yo‘l-transport hodisasi sodir etgan.
Oqibatda ikkala avtomashina haydovchilari tan jarohatlari bilan Samarqand viloyati RShTYoIM filialiga yotqizilgan.
Hodisa yuzasidan tergovga qadar tekshiruv harakatlari olib borilmoqda.
Namanganda “VAZ-2107” va Nexia ishtirokida YTH sodir bo‘ldi
2022-yil 17-fevral kuni soat 02:00 larda Namangan shahri A.Navoiy ko‘chasida haydovchi D.M. (1998-yilda tug‘ilgan) boshqaruvidagi “VAZ-2107” hamda haydovchi R.M. (1983-yilda tug‘ilgan) boshqaruvida bo‘lgan Nexia avtomobillari ishtirokida to‘qnashuv sodir bo‘lgan.
Hodisa oqibatida tan jarohati olganlar yo‘q. Transport vositalariga texnik shikast yetgan.
Mazkur YTH yuzasidan Namangan shahar IIB huzuridagi TB tomonidan surishtiruv harakatlari olib borilmoqda.
Namanganda qizil chiroqda o‘tib ketgan Isuzu Damas bilan to‘qnashdi
2022-yil 17-fevral kuni soat 02:00 larda 4R112 Farg‘ona halqa avtomobil yo‘lining 6-kilometridagi chorrahada Qashqadaryo viloyatida yashovchi fuqaro (2000-yilda tug‘ilgan) Isuzu avtomashinasini tegishli hujjatlar bilan Namangan–Toshkent yo‘nalishi bo‘ylab boshqarib borayotib, chorrahada svetoforning taqiqlovchi qizil chirog‘ida o‘tib ketgan.
U harakat xavfsizligini ta’minlay olmasdan, chorrahani kesib o‘tayotgan Namangan viloyatida yashovchi fuqaro (1990-yilda tug‘ilgan) boshqaruvida bo‘lgan Damas avtomashinasiga borib urilib, yo‘l-transport hodisasi sodir etgan.
Oqibatda Damas yo‘lning chap tomoniga chiqib ag‘darilib ketgan.
Hodisa oqibatida Damas’da bo‘lgan ikki nafar yo‘lovchi vafot etgan. Haydovchi va bir yo‘lovchi tan jarohati olgan. Isuzu haydovchisi va undagi yo‘lovchi ham shifoxonaga yotqizilgan.
Hozirda mazkur holat bo‘yicha tuman IIB huzuridagi TB tomonidan tergovga qadar tekshiruv harakatlari olib borilmoqda.
Izoh (0)