Forbes versiyasi bo‘yicha ukrainalik eng badavlat biznesmen Rinat Axmetov eng katta aktivi — “Metinvest” xoldingining shtab-kvartirasi joylashgan Mariupol shahriga keldi. Bu haqda biznesmenning aktivlarini birlashtirib turuvchi System Capital Management xoldingining Facebook’dagi sahifasida ma’lum qilindi.
“Mariupol. Qadrdon yerim”, — deyiladi Axmetov, xalq deputati Vadim Novinskiy tasvirlangan surat izohida.
“Ukrainskaya pravda” nashri 13-fevral kuni Kiyevdan ichida ukrainalik oligarx va biznesmenlar bo‘lgan 20 ga yaqin charter reys hamda shaxsiy samolyotlar uchib ketganini ma’lum qilgandi.
Nashr Axmetovning charter samolyoti Ukrainadan Shveysariyaning Syurix shahri tomon yo‘l olganini yozgan. Shu bilan birga, boshqa bir manba Axmetovning o‘zi Ukrainadan 30-yanvarda chiqib ketganini bildirgandi.
Ushbu maqoladan so‘ng Axmetovning matbuot kotibi Anna Terexova biznesmen 16-fevral kuni Mariupolga qaytishini ma’lum qilgan.
Ukraina prezidenti Vladimir Zelenskiy biznesmen va deputatlar ketib qolayotgani to‘g‘risidagi xabarlardan so‘ng, ular “o‘zlariga allaqachon hukm chiqarib bo‘ldi” degandi. “Ular o‘z korxonalariga, o‘zlari va davlat uchun ishlayotgan o‘n minglab ishchilari oldiga qaytishi kerak deb hisoblayman”, — degan Zelenskiy. Bundan tashqari, davlat rahbari Oliy Radaning xorijga chiqib ketgan deputatlarini 24 soat ichida mamlakatga qaytishga chaqirgan.
G‘arb OAVlari 2021-yil oktabridan buyon Rossiya Ukrainaga hujum qilishga tayyorlanayotgani haqida ogohlantirmoqda. Oxirgi marta G‘arb nashrlari va agentliklari — Bloomberg, Spiegel va Politico Rossiya Ukrainaga 15—16-fevral kuni hujum uyushtirishni rejalashtirayotganini yozgan.
Nashr tomonidan tilga olingan biznesmenlarning uch nafari “bosqin” xavfi sabab Ukrainadan chiqib ketganini rad etgan.
Rinat Axmetov — eng badavlat ukrainalik, Forbes uning boyligini 7,6 milliard dollarga baholagan. Ukraina janubi-sharqida ziddiyat boshlangunga qadar uning boyligi 22,3 milliard dollarga baholangan — o‘shanda “Donbass egasi” deya ta’riflangan Axmetov rossiyalik biznesmenlardan ham boyroq bo‘lgan (Bloomberg’ning 2013-yilgi baholashi bo‘yicha). 2014-yilning sentabrida agentlik ukrainalik biznesmenning boyligini 12,7 milliard dollar deb ko‘rsatgandi.
Axmetovning asosiy aktivlarini Ukrainadagi eng yirik moliyaviy-sanoat guruhi SCM Limited birlashtiradi. Unga ko‘mir, tog‘-kon, koks-kimyo, metallurgiya va quvur sanoati, ko‘mir qazib olish va elektroenergetika sanoatini birlashtiruvchi Metinvest B.V. xoldingining 71,24 foizi tegishli.
Bundan tashqari, SCM tarkibida Birinchi Ukraina xalqaro banki, Corum Group mashinasozlik, “Portinvest” transport kompaniyalari, “Ukrtelekom” aloqa kompaniyasi boshqa ko‘plab korxonalar kiradi. Kompaniyalarning jami portfeli dunyoning 30 davlatida 500 dan ortiq korxonalarni o‘z ichiga oladi va ularda 200 mingga yaqin xodim ishlaydi.
Izoh (0)