«Ички ишлар органларининг эксперт-криминалистика фаолиятини замонавий илм-фан ютуқларини кенг жорий этган ҳолда янада такомиллаштириш чора-тадбирлари тўғрисида»ги қарорга мувофиқ, туғма ногиронлиги бўлган шахслар ИИВнинг криминалистика йўналишига қабул қилинади. Бу ҳақда «Ёшлар» телеканали орқали эфирга узатилган лавҳада маълум қилинди.
«Бу инсонларга керакли нафақа тайинланган. Уларнинг орасига кириб ўрганганимизда шу нарса маълум бўлдики, буларга берилаётган нафақалар уларни жамиятнинг бир аъзоси сифатида эҳтиёжларини қондирмайди. Яъни бу фуқароларда жамиятда бошқалар каби меҳнат қилиб, ўзи пул топиб, давлатимиз ривожланишига ҳисса қўшиш хоҳиши бор. Худо бир томонидан қисган бўлса, иккинчи томонидан истеъдод берган. Бу истеъдодлар айнан бизнинг криминалистикадаги зийраклик, синчковлик ва зийраклик амалиётида қўл келади», — дейди ИИВ Эксперт криминалистика бош маркази бошлиғи Саидолим Нуриддинов.
Унинг сўзларига кўра, шу мақсадда ушбу шахсларни мутахассис ёки техник ишчи сифатида экспертлик бўлинмаларига шартнома асосида жалб этиш амалиётини йўлга қўйиш топшириғи берилган.
Таъкидлаш керакки, президент қарори билан ички ишлар органларининг эксперт-криминалистика бўлинмаларига эксперт-криминалистика соҳасида жисмоний ва юридик шахсларга шартнома асосида экспертлик, биометрик идентификация, илмий-тадқиқот ва ахборот хизматларини ҳамда соҳага оид бошқа пуллик хизматларни кўрсатиш ҳуқуқи берилган.
Изоҳ (0)