Қашқадарё вилоятининг Қарши шаҳридаги озиқ-овқат бозорларидан бирининг бозорқўми 900 минг сўм пулни ноқонуний ўзлаштираётган пайтида қўлга олингани хабар берилганди. Бозорқўмнинг қилмишини «Дарё»га очиқлаган мурожаатчиларнинг айтишича, вазият босди-босди қилиниши мумкин.
«2021 йил 18 ноябрь куни тадбир ўтказилиб, бозорқўмни 900 минг сўм пул билан ушлаб кетишганди. Лекин эртаси куни яна ишга чиқди. Бир кун олдин пора билан ушланган бозорқўмнинг яна ишга қайтганини кўриб ҳайрон қолдик. Катта тадбир натижаси бекор қилиниб, воқеа ими-жимида ёпиб юборилиши мумкинми?», — дейди тадбир иштирокчиси бўлган Ҳусан Мирзаев.
Ҳусан Мирзаевнинг қўшимча қилишича, тадбир бўлиб ўтган кун — 2021 йилнинг 18 декабрь куни бозордан 2 миллион 400 минг сўм пул йиғиб олинган бўлиб, шундан 1 миллион 500 минг сўми касса орқали кирим қилинган. Қолган пулга эса кимёвий ишлов берилиб, бозорқўмга берилган.
Пора тадбиридан сўнг ишга қайтган бозорқўм томонидан ишдан бўшатилган Ҳусан Мирзаев бозорқўм бозордан тушган даромаднинг ортиқчасини доимий равишда унга берилишини талаб қилиб келганини айтмоқда.
«Бу ҳолат 2021 йилнинг 14 ноябридан бери бор. Бозорқўм ўша пайтдан бери йиғиб олинган пуллардан унга беришимни талаб қилиб келади. Бу ҳолат кун сайин авж олиб боргани боис масъул ташкилотларга мурожаат қилишга мажбур бўлдим. Лекин масъуллар бунга аҳамият беришмаяпти шекилли, вазият ҳамон ўша-ўша. Бозорқўм эса доимгидек ишини давом эттирмоқда. Мен унинг ишига халал берганим учун мени ишдан бўшатиб, танишларини ишга олди», — дейди Ҳусан Мирзаев.
Мурожаатчи мазкур масала юзасидан вилоят ИИБга мурожаат қилганини, улар ҳолат ўрганилаётганини, тез орада жавобгарлик масаласи ҳал этилишини билдирганини айтмоқда.
Мазкур воқеа ҳақида «Дарё» мухбири билан суҳбатлашган вилоят ИИБ ахборот хизмати раҳбари Жавлон Бахтиев: «Ҳақиқатан ҳам ўтган шанба куни тезкор тадбир ўтказилганди. Тадбирда бозорқўм билан боғлиқ ҳолат рўй бергани рост. Аммо уни пора билан қўлга тушди, дейишга шошмаслигимиз керак. Бу масала юзасидан терговга қадар текширув ҳаракатлари олиб борилмоқда. Тез орада бу ҳақда вилоят прокуратурасига маълум қиламиз», — деганди.
Жавлон Бахтиевнинг қўшимча қилишича, бозорқўмга нисбатан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.
Изоҳ (0)