Давлат хавфсизлик хизмати «Ислом давлати» террор ташкилоти (ИШИД)нинг яна бир аъзосини хорижда қўлга олиб, Ўзбекистонга олиб келди.
Маълум қилинишича, 53 ёшли Д.У. ўғли Д.Х. (1994 йилда туғилган) билан биргаликда 2009–2015 йилларда Россияда меҳнат мигранти сифатида ишлаши даврида ижтимоий тармоқлар орқали халқаро террорчилик ташкилотлари аъзоларининг таъсирига тушиб қолган.
Натижада, 2015 йилнинг сентябрь ойида ота-бола ўзларининг шахсини ошкор қилмаслик мақсадида Тожикистоннинг сохта паспортини расмийлаштириб, Туркия орқали Сурия давлатига боради ҳамда ИШИД халқаро террористик ташкилоти аъзолари сафига қўшилиб, жанговар ҳаракатларда иштирок этишади.
Кейинроқ Д.У. Суриядан МДҲ давлатларидан бирига қўпорувчилик ҳаракатларини амалга ошириш мақсадида қайтиб келган. Давлат хавфсизлик хизмати ходимларининг хорижий ҳамкорлар билан биргаликда олиб борган тезкор-қидирув тадбирлари натижасида Д.У. ушланиб, Ўзбекистонга олиб келинган.
Таъкидланишича, қўлга олиш вақтида Д.У. фаол қаршилик кўрсатган бўлса, кейинги жараёнларда у ўзининг «жиҳод» қилиш борасидаги қарашларидан воз кечмаганини билдирган. Ҳозирда унга нисбатан Жиноят кодексининг тегишли моддалари билан қўзғатилган жиноят иши доирасида тергов ҳаракатлари олиб борилмоқда.
Шунингдек, Д.У.нинг ўғлига нисбатан қидирув эълон қилинган.
Аввалроқ Суриядаги жангарилар сафига қўшилмоқчи бўлган ўзбекистонлик эркак Россияда ушлангани, Ўзбекистонда қидирувда бўлган шахс Россияда қўлга олингани, Давлат хавфсизлик хизмати ходимлари халқаро террористик ташкилотга алоқадорлиги учун қидирувда бўлган 26 ёшли С.С.ни хориждан Ўзбекистонга олиб келгани, Қирғизистоннинг Ўш шаҳрида «Ҳизб ут-Таҳрир» диний-экстремистик ташкилотининг Ўзбекистондаги фаолиятига масъул бўлган фуқаро қўлга олингани тўғрисида хабар берилганди.
Мавзуга доир:
Изоҳ (0)