1 февраль ҳолатига кўра, Ўзбекистонда турк капитали иштирокидаги 1912 та компания фаолият юритмоқда. Бу ҳақда Давлат статистика қўмитаси маълумотларида қайд этилди.
Бу эса Россия (2313) ва Хитойдан (1948) кейинги учинчи кўрсаткичдир. 2022 йилнинг январь ойида турк тадбиркорлари Ўзбекистонда 31 та, хитойлик тадбиркорлар эса ўзларининг 12 та янги корхоналарини очишди.
Жадал ўсиш 2021 йилда, турк капитали иштирокидаги 407 та янги корхона ташкил этилган пайтга тўғри келди.
Бу энг юқори кўрсаткич бўлиб, иккинчи ўринни Россия (365 та компания), учинчи ўринни Хитой (266 та компания) эгаллаган.
Нима учун Туркия Ўзбекистонда шунчалик фаол?
Турк тадбиркорларининг сўзларига кўра, сўнгги йиллардаги Туркия иқтисодиёти юзага келган инқироз туфайли қийинчиликларни бошдан кечирмоқда, тадбиркорлар эса ушбу ҳолатни бошқа бозорларга чиқиш орқали қоплашни режалаштиришмоқда.
Февраль ойининг ўрталарида Fitch агентлиги Туркия рейтинг прогнозини «салбий»гача туширди. Fitch мутахассисларининг фикрига кўра, паст рейтингга юқори инфляция ҳолати, ташқи ликвидликнинг пастлиги ва мамлакат сиёсатига бўлган ишончсизлик каби бир неча омиллар сабаб бўлган.
Турк лираси 2021 йилнинг охирларида ўз баҳосининг ярмини йўқотган. Мамлакат марказий банки керакли чораларни кўрди, бироқ инфляция ҳолати 48,7 фоизгача ошди. Мазкур кўрсаткич сўнги 20 йил ичидаги энг юқори деб белгиланди.
Аввалроқ Туркия ҳукумати вакиллари аҳолидан миллий валюта қийматини сақлаб қолиш учун доллар валютасидан вос кечишни сўрагани ҳақида хабар берилган эди.
Изоҳ (0)