Freedom Holding инвестицион компанияси PayBox Technologies халқаро тўловлар тизимини сотиб олмоқчи. Бу ҳақда холдинг ҳисоботида хабар берилмоқда.
PayBox штаб-квартираси Қозоғистонда жойлашган бўлиб, бундан ташқари, компания Ўзбекистон, Қирғизистон ва Россияда ҳам фаолият олиб боради.
Қайд этилишича, шартнома Қозоғистон монополияга қарши курашиш қўмитаси томонидан маъқулланмоқда.
Холдинг вакилининг сўзларига кўра, PayBox мобил телефон балансидан фойдаланган ҳолда тўлов хизматларини кўрсатади. Шунингдек, PayBox’да банк карталари ёрдамида интернет орқали тўловларни амалга ошириш мумкин.
Келажакда Freedom PayBox бизнесини трансформация қилишни ва Қозоғистондаги Freedom Finance Bank’нинг эквайринг тўлов бизнесини кучайтиришни режалаштирмоқда.
Бундан ташқари, маҳаллий FFin-Bank билан биргаликда ушбу компанияни Россияда ривожлантириш асосий мақсадлардан бири.
Компания келишув қийматини ошкор қилишдан бош тортди.
Freedom Finance инвестицион компанияси 2018 йилнинг апрель ойидан бошлаб Ўзбекистонда ўз фаолиятини бошлаган. Компания мамлакатда молия брокерлиги, инвестиция маслаҳатлари ва банк хизматлари каби соҳаларда иш юритади.
PayBox Ўзбекистонда Uzcard, Humo ва бошқа тўлов тизимлари билан ишлайди.
Аввалроқ Freedom Holding халқаро компанияси асосчиси Тимур Турлов Ўзбекистондаги инвестиция фаолияти тўғрисида гапириб ўтганди.
Изоҳ (0)