«Газпромбанк» Ўзбекистондаги Самарқанд халқаро аэропортини модернизация қилиш ва бошқариш лойиҳасини молиялаштиришда иштирок этиш имкониятларини кўриб чиқмоқда.
Лойиҳа доирасидаги давлат-хусусий шериклиги (ДХШ) келишуви 2021 йил 22 сентябрда Uzbekistan Airports АЖ (давлат ҳамкори) ва Air Marakanda МЧЖ (хусусий шерик) ўртасида имзоланган.
Ҳозирги вақтда лойиҳа молиявий ёпилиш босқичига ўтиш учун тайёргарликни якунлади. 2022 йил 7 февралда ДХШ битими томонлари лойиҳани амалга оширишнинг энг муҳим ва асосий шартларини белгилаб олди.
Қайд этилишича, «Газпромбанк» ҳам ушбу ташаббусни амалга оширишда Air Marakanda МЧЖ иштирокининг молиявий ва тижорат жиҳатлари бўйича молиявий маслаҳатчи ҳисобланади.
Лойиҳанинг умумий бюджети 83 миллион доллардан ошади. Ушбу маблағга Самарқанд шаҳридаги аэропортни ҳар томонлама ривожлантириш, аэропорт инфратузилмасини қуриш, кейинчалик ишга тушириш кўзда тутилган.
Янги халқаро йўловчи терминалининг ишга туширилиши 2022 йилнинг 1-чорагида режалаштирилган.
Лойиҳа Ўзбекистондаги энг йирик EPC пудратчиларидан бири — Enter Engineering томонидан амалга оширилмоқда.
Самарқанд аэропорти республика ҳаво транспорти саноати учун стратегик аҳамиятга эга. Ушбу ташаббус иштирокчиларининг саъй-ҳаракатлари туфайли аэропорт янги ривожланиш босқичига кўтарилиши айтилмоқда.
«Лойиҳанинг амалга оширилиши бутун мамлакат бўйлаб барқарор иқтисодий ўсишни таъминлаш, жумладан, республикага туристлар оқимини кўпайтириш, сармоявий жозибадорлик ва умуман фаровонликни оширишга хизмат қилади. «Газпромбанк» ушбу лойиҳада иштирок этишдан манфаатдор, бу Ўзбекистон давлат-хусусий шериклик бозори учун муҳим воқеа бўлишини ваъда қилмоқда», — дейди «Газпромбанк» бошқаруви раиси ўринбосари Алексей Белоус.
Модернизация аэропортнинг йўловчи ташиш ҳажмини босқичма-босқич йилига 1,5 миллион йўловчига етказади ва шаҳарни жорий йилнинг сентябрь ойида бўлиб ўтадиган Шанхай ҳамкорлик ташкилоти (ШҲТ) саммитини муносиб кутиб олишини таъминлайди.
Фуқаро авиацияси соҳасида давлат-хусусий шериклик тўғрисидаги шартнома Ўзбекистонда илк бор тузилмоқда. Ҳамкорликнинг бундай формати халқаро амалиётда ўзини оқлаган. Чунки икки томоннинг ресурсларини бирлаштириш аэропорт инфратузилмасини яхшилашга, янги ёндашувларни топишга ёрдам беради.
«Газпромбанк» инвестиция ҳамкори лойиҳасида иштирок этиш Ўзбекистон Республикасининг та логистика соҳалари ривожланаётган улкан салоҳиятидан далолат беради», — дейди Air Marakanda МЧЖ директори Ғайрат Неъматов.
Октябрь ойида Самарқанд аэропорти бир ойга ёпилган эди. Аввалроқ 2021 йилнинг июль ойида Самарқанд аэропортига янги директор тайинланган эди.
Изоҳ (0)