Ўзбекистоннинг Украинанинг Киев шаҳридаги элчихонаси ватандошлар учун Telegram гуруҳи орқали Украинада бўлган ўзбекистонликларга мурожаат билан чиқди, деб хабар бермоқда «Дунё» АА.
Мурожаатда элчихона Украина давлат органлари, дипломатик корпус ва ўзбекистонликлар билан доимий алоқада эканини билдириб, «тасдиқланмаган, сохта маълумотларни тарқатмасликни ва ваҳима қўзғамасликни» сўраган.
Шунингдек, Uzbekistan Airways Киев—Тошкент—Киев йўналиши бўйича мунтазам рейслар амалга ошираётгани ва ватанга қайтиш истагида бўлган фуқаролар ушбу рейс орқали Ўзбекистонга қайтишлари мумкинлиги маълум қилинган.
Қайд этилишича, ушбу йўналиш бўйича 13 февраль куни қатнов амалга оширилган. Навбатдаги рейслар режа бўйича 16 ва 20 февраль кунлари ўтказилади.
Тобора таранглашиб бораётган Россия—Украина ўртасидаги вазият ортидан кўплаб мамлакатлар ўз фуқароларини Украинани зудлик билан тарк этишга чақирмоқда. 10 февралда АҚШ давлат департаменти фуқароларга Украинага бормаслик ёки зудлик билан Россия ҳарбий ҳаракатлари хавфи бўлган ва COVID-19 билан касалланишлар кўпайган ҳудуддан кетишни тавсия этди. АҚШ президенти Жо Байден Украинадаги барча америкаликларни ҳозироқ мамлакатдан кетишга чақирди. АҚШдан кейин Нидерландия, Черногория, Япония, Латвия, Буюк Британия ва Жанубий Корея ҳам фуқароларидан Украинага бормасликни сўради.
Изоҳ (0)