Андижондаги портлашда ҳалок бўлган шахс Қирғизистон фуқароси экани маълум бўлди

Андижон вилоятининг Шаҳрихон туманида жойлашган хусусий шифохонада 11 февраль куни газ портлаши содир бўлгани, оқибатда бир киши вафот этгани хабар берилганди. Ҳалок бўлган шахс Қирғизистон фуқароси экани маълум бўлди.

Қирғизистон ТИВ матбуот хизмати баёнотида айтилишича, ҳалок бўлган 56 ёшли фуқаро жасади яқин қариндошлари томонидан Қирғизистонга етказилган.

Воқеа 11 февраль куни соат 11:30 да Чинобод кўчасида жойлашган 3 қаватли «Зитерия» МЧЖ Диагностика ва даволаш масканининг 1-қаватида юз берганди. Ҳодиса оқибатида бир киши вафот этган, 11 нафар киши жароҳатланган.

Ҳолат юзасидан Жиноят кодексининг 257-моддаси (меҳнатни муҳофаза қилиш қоидаларини бузиш) билан жиноят иши қўзғатилган.