Шавкат Мирзиёев 7 февраль куни бир нечта қурилиш лойиҳалари тақдимоти билан танишганди. Улар орасида Тошкент шаҳрининг Яшнобод туманида қуриладиган Олимпия шаҳарчаси ҳам бор.
Маълумки, Осиё Олимпия кенгашининг қарорига кўра, 2025 йилда ёшлар ўртасидаги Осиё ўйинлари Тошкентда бўлиб ўтади. Бундай нуфузли халқаро мусобақа Ўзбекистон тарихида биринчи маротаба ўтказилади. Давлат раҳбари бу мамлакатга кўрсатилган катта ишонч эканини, ушбу мусобақага ҳозирдан бошлаб пухта тайёргарлик кўриш кераклигини таъкидлаган эди.
Шу мақсадда 160 гектар майдонда Олимпия шаҳарчаси қуриш бўйича лойиҳа ишлаб чиқилган. Мазкур шаҳарчада универсал стадион, очиқ ва ёпиқ спорт мажмуалари, ётоқхона, меҳмонхона, Чирчиқ дарёсида эшкак эшиш ҳавзаси барпо этилади. Бу инфратузилма йирик мусобақалар ўтказиш ва бўлажак Олимпия захиралари институти учун ўқув-машғулот базаси бўлади.
Телеканалга интервью берган Mimar Group бош архитектори Шукурулло Жаҳонгировнинг маълум қилишича, президент Олимпия захиралари институти ва унинг ётоқхонасини қуриш, ишларни сифатли ва жадал олиб борилишини таъминлаш ҳамда биноларни тежамкор қилиб қуриш бўйича топшириқ берган.
Унинг сўзларига кўра, лойиҳа Аруп компанияси томонидан ишлаб чиқилган бўлиб, модулли фасадлар системасини таклиф қилган. «Бу бизнинг миллий нақшлардан олган ҳолда ҳозирги кунда трендда бўлган модуль тизимидир. Яъни ҳар бир фасад элементлари заводдан тайёр ҳолда чиқарилиб, қурувчиларга тайёр ҳолда келади. Бунинг натижасида, биринчидан, тежамкорлик, иккинчидан, тезлик ошади, учинчидан, иқтисодий тежамкорлик бўлади», — деган Шукурулло Жаҳонгиров.
Изоҳ (0)