Ўзбекистонда ички ишлар органларининг экспертлари пуллик хизматлар кўрсатади

Шавкат Мирзиёевнинг «Ички ишлар органларининг эксперт-криминалистика фаолиятини замонавий илм-фан ютуқларини кенг жорий этган ҳолда янада такомиллаштириш чора-тадбирлари тўғрисида»ги қарори қабул қилинди. Бу ҳақда Норма хабар қилди.

Қайд этилишича, ҳужжат билан қуйидагилар тасдиқланган:

• Ички ишлар вазирлиги Эксперт-криминалистика бош маркази тўғрисида низом;
• Ички ишлар органларининг эксперт-криминалистика фаолиятини янада такомиллаштириш бўйича «йўл харитаси»;
• Ички ишлар органлари эксперт-криминалистика бўлинмаларини 2022 йилда моддий-техника воситалари билан таъминлаш дастури.

Қабул қилинган қарор билан ички ишлар органларининг эксперт-криминалистика фаолиятини янада такомиллаштиришга оид бир қатор устувор йўналишлар белгиланган. Жумладан, замонавий фан ва техниканинг илғор ютуқларини, рақамли технологияларни, криминалистиканинг янги илмий усул ва воситаларини қўллаш механизмлари жорий этилади, автоматлаштирилган криминалистик ахборот-қидирув тизимлари ва ахборот базалари яратилади.

Ахборот технологиялари ёрдамида содир этиладиган ҳуқуқбузарликлар бўйича рақамли экспертизанинг имкониятларидан фойдаланилади. Шахсга доир биометрик маълумотлар (геномга оид ахборот, юз қиёфаси, қўлбармоқ, излари) асосида автоматлаштирилган идентификация тизимлари татбиқ қилинади.

Тезкор-қидирув тадбирлари, тергов ва суд ҳаракатларида ашёвий далиллар тадқиқотининг янги турлари, инновацион криминалистик ёндашув, усул ҳамда техник воситалари кенг жорий этилади. Эксперт-криминалистика соҳасида кадрларни мақсадли тайёрлаш, қайта тайёрлаш ва малакасини ошириш бўйича самарали ўқув-амалиёт жараёни ташкил этилади.

ИИВ Эксперт-криминалистика бош маркази тузилмасида Генетик тадқиқотлар ва Шахснинг геном ахборотини давлат рўйхатига олиш бўлимлари ташкил этилади. Шунингдек, ўқотар, пневматик, газли, сигнал берувчи, совуқ, улоқтирувчи ва бошқа қуроллар, уларнинг ўқ-дориларини, махсус воситаларни, ўқ ўтказмайдиган махсус ҳимоя воситаларини, электрошок қурилмалари, пиротехника буюмлари ва портловчи материалларни сертификатлашни амалга оширувчи давлат муассасаси ташкил этилади.

Ички ишлар органларининг эксперт-криминалистика бўлинмаларига эксперт- криминалистика соҳасида жисмоний ва юридик шахсларга шартнома асосида экспертлик, биометрик идентификация, илмий-тадқиқот ва ахборот хизматларини ҳамда соҳага оид бошқа пуллик хизматларни кўрсатиш ҳуқуқи берилади.

Шунингдек, қарорда қуйидагилар белгиланди:

• махсус илмий-техник ва интеллектуал салоҳиятга эга шахслар мутахассис ёки техник ишчи сифатида эксперт-криминалистика бўлинмаларига шартнома асосида жалб этилиши мумкин;
• ИИВ академияси Криминалистик экспертизалар кафедраси белгиланган тартибда тегишли суд экспертизалари (дактилоскопик, трасологик, баллистик, совуқ қуроллар, портрет, хацҳунослик ва бошқалар) ва тадқиқотларни ўтказиш ҳуқуқига эга.

Эслатиб ўтамиз, 2021 йил ноябрь ойида ҳукумат қарори билан «Геном бўйича давлат рўйхатига олиш тартиби тўғрисида»ги низом тасдиқланганди. Унга кўра, жазони ижро этиш муассасалари ва пробация хизмати геном бўйича мажбурий рўйхатга олинадиган шахслар рўйхатини шакллантиради. Ихтиёрий равишда давлат рўйхатига олиш эса фуқароларнинг ёзма аризасига кўра пуллик асосда амалга оширилади.

Геном бўйича давлат рўйхатига олиш — биологик материалдан фойдаланиш, одамнинг шахсини, таниб олинмаган мурдани аниқлаш учун геномга оид ахборотга ишлов бериш билан боғлиқ фаолият.