Сурхондарё вилоятида Давлат хавфсизлик хизмати интернет орқали ақидапарастлик ғояларини тарғиб қилган шахсни қўлга олди. Бу ҳақда ЎзА хабар қилди.
Қайд этилишича, ДХХ ходимлари томонидан амалга оширган тезкор тадбир давомида фуқаро А.А.нинг телефон аппарати кўздан кечирилган. Фуқаро Instagram ижтимоий тармоғида профилида фуқаро Рафиқ Камоловнинг «бенамозлик, намоз мўмин кишининг ҳужжати, намоз ўқимаган одамнинг ҳужжати йўқлиги...» мавзусидаги видеомаърузаси ва жуда кўплаб диний мазмундаги материалларни жойлаштириб тарқатгани аниқланган.
Тарқатилган материаллар текшириб кўриш учун DVD+Р дискка кўчириб олиниб, Вазирлар Маҳкамаси ҳузуридаги Дин ишлари бўйича қўмитага юборилган.
Қўмитанинг экспертлик хулосасида А.А.нинг тарқатган видеоматериаллари ақидапарастлик ғоялари билан йўғрилган бўлиб, уларни Ўзбекистон ҳудудига олиб кириш, тайёрлаш, тарқатиш тақиқланиши маълум қилинган.
А.А.нинг ҳаракатида Жиноят кодексининг 244-1-моддаси 3-қисми «г» бандида назарда тутилган жиноят таркибининг аломатлари мавжудлигини инобатга олиб ҳамда Жиноят-процессуал кодексининг тегишли моддалари талабларини қўллаб, унга нисбатан Жиноят кодексининг 244-1-моддаси 3-қисми «г» банди билан жиноят иши қўзғатилган.
Изоҳ (0)