Халқ таълими вазири Андижондаги узр сўрашга мажбурланган ўқитувчилар билан учрашди

Андижон вилояти Марҳамат туманидаги мактаблардан бирида ўқитувчилар ўқув муассасасида таълим сифати, ўқувчиларнинг олийгоҳларга кириш кўрсаткичи пастлиги, ўзлаштириши қониқарсиз экани туфайли ота-оналар олдида тик туриб, узр сўрагани хабар қилинганди. Халқ таълими вазири Бахтиёр Саидов тумандаги узр сўрашга мажбурланган ўқитувчилар билан учрашди.

Қайд этилишича, вазир ўқитувчилар билан суҳбатлашиб, уларнинг обрўси ва қадр-қиммати давлат сиёсати даражасидаги муҳим масала экани ва уларни обрўсизлантиришга ҳеч ким ҳақли эмаслигини айтган ҳамда юз берган ҳолатни устоз шаънини ерга уриш деб баҳолаган.

«Шавкат Мирзиёев ўқитувчиларни улуғлаш масаласини давлат сиёсатининг энг юқори даражасига олиб чиқиб, ўқитувчи жамиятимизнинг энг ҳурматли инсони бўлиши эканини доимий равишда таъкидлаб келмоқда. Шундай экан ўқитувчини хафа қилишга ҳеч кимнинг ҳаққи йўқ. Ўқитувчи қадрланмаган юртнинг эртаси бўлмайди. Шундай экан, бугун ҳар биримиз, ҳаттоки ўқитувчиларнинг ўзи ҳам шаъни ва обрўсини ошириш учун ҳаракат қилиши зарур», — деган Бахтиёр Саидов ўқитувчилар билан учрашувда.

Учрашув сўнгида вазир ўқитувчиларнинг фикрларини тинглаган. Улар билан маслаҳатлашган ҳолда мазкур ҳолатга йўл қўйган мутасаддиларга чора кўрилиши қайд этган.

Эслатиб ўтамиз, 8 февраль куни Андижон вилояти Марҳамат туманида ўқитувчилар мактабларда ўқувчиларнинг ўзлаштириши қониқарсиз экани туфайли ота-оналардан узр сўрагани айтилган хабар эълон қилинди. Ҳолат кенг жамоатчилик вакиллари орасида муҳокамага сабаб бўлди. Хусусан, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов «Шуҳрат Абдураҳмоновнинг шахсан ўзи барча устозлардан узр сўраши керак»лигини ёзди.

Халқ таълими вазири ҳам ҳолатга муносабат билдириб, ўқитувчиларнинг шаънини ерга уришни давлат сиёсатига қарши ҳаракат деб баҳолашини билдирган.

«Ўқитувчи қадрланмаган юрт ҳеч қачон тараққий этмайди. Бу ҳаракат қандай мақсадда амалга оширилгани менга қоронғи, лекин айбдорлар албатта жавоб бериши керак. Шу ўринда мен ўқитувчилардан ўз қадр-қимматларини ерга уришга йўл қўймасликларини сўраб қоламан. Сизнинг бу даражада бошингизни ерга қаратишга ҳеч кимнинг ҳаққи йўқ!», — деган вазир.

Ўқитувчилар узр сўраши ортидан туман ҳокимлиги баёнот билан чиқди. Унда айтилишича, «ўтказилган ушбу тадбир ижтимоий тармоқларда бошқача ҳолатда талқин қилинмоқда. Тадбирда ота-оналар фарзандларнинг буюк келажаги учун ўқитувчилар билан биргаликда ҳаракат қилишга чақирилган».

Кейинроқ Андижон вилояти ҳокими Шуҳрат Абдураҳмонов ҳам ушбу ҳолатга муносабат билдириб, «хатога йўл қўйган ҳар қандай раҳбарга қонунда белгиланган жазо чораларини кўрилишини таъминланишини»ни таъкидлади. Андижон вилояти халқ таълими бошқармаси бошлиғи ва Марҳамат тумани ҳокими ўқитувчилардан узр сўради.

ХТВнинг маълум қилишича, ҳолат юзасидан ўрганиш натижаларига қонуний баҳо бериш учун ҳужжатлар Бош прокуратурага юборилган.