Роберт Левандовски IFFHS талқинига кўра бир йил ичида 4 та индивидуал соврин қўлга киритган илк футболчига айланди

Халқаро футбол тарихи ва статистикаси федерацияси (IFFHS) «Бавария» ҳужумчиси Роберт Левандовскига 2021 йил якунлари бўйича тўртта соврин топширди.

33 ёшли польшалик футболчи «дунёнинг энг яхши футболчиси», «топ-лигаларнинг энг яхши тўпурари», «бир календарь йилининг энг яхши тўпурари» ва «халқаро турнирларнинг энг яхши тўпурари» номинацияларида ғолиб чиқди.

IFFHS тарихида, аниқроғи, 1987 йилдан бери ҳеч бир футболчи бир йил ичида иккитадан ортиқ соврин қўлга киритмаган. 2012 йилда Лионель Месси иккита совринни ўзиники қилган бўлса, 2014 ва 2020 йилларда Криштиану Роналду ва Левандовски ҳам шундай натижага эришган.

Бир йил ичида 4 та IFFHS мукофотини қўлга киритган биринчи ўйинчи бўлиш – катта шараф. Футбол саргузаштимда менга ҳамроҳлик қилган барчага катта раҳмат.

Роберт Левандовски, «Бавария» ҳужумчиси

Робертнинг «Бавария» билан амалдаги шартномаси 2023 йил ёзида ўз ниҳоясига етади. Левандовски 2021/22 йилги мавсум Бундеслигада 21 та ўйинда майдонга тушиб, 24 та гол муаллифига айланган.