«ПСЖ» футболчиларнинг маоши учун қанча пул сарфлаши маълум бўлди.
Mundo Deportivo хабарига кўра, француз клубининг маошлар ведомости 629 миллион еврони ташкил этади. Бундан ташқари, яна 136 миллион евро маошлар билан боғлиқ турли харажатларга сарфланади. Бу Лига 1 нинг барча клублари маошлар учун сарфлайдиган маблағнинг (1,73 миллиард евро) 37 фоизини ташкил этади.
Шунингдек, 629 миллион евро — Европадаги энг юқори маошлар ведомости ҳисобланади.
2020/21 йилги мавсумда парижликлар маошлар учун, тахминан, 500 миллион евро, 2019/20 йилги мавсумда 414 миллион евро, 2018/19 йилги мавсумда эса 370 миллион евро сарфлаган.
Эслатиб ўтамиз, 2021 йилнинг ёзида «ПСЖ» сафига Лионель Месси, Серхио Рамос, Ашраф Ҳакими, Жанлуижи Доннарумма ва Жоржинио Вейналдум сингари юқори маош олувчи футболчилар келиб қўшилди.
«ПСЖ» Франция чемпионатининг 23 туридан кейин 56 очко билан мусобақа жадвалида пешқадамлик қилмоқда. Жамоа 2-поғонадаги «Марсель»дан 13 очкога илгарилаб кетган.
Изоҳ (0)