Японияда кучли қор бўронлари кузатилди ва мамлакатнинг айрим ҳудудларига рекорд даражада қор тушган. Бу ҳақда The Weatherс хабар берди.
Япония метеорология агентлиги қор бўронлари қишки совуқ ҳаво массасининг ортиб кетиши билан боғлиқлигини қайд этган.
Тига префектурасининг Майбара шаҳрида рекорд даражада қор ёғган ва қорнинг қалинлиги 62 сантиметргача етган. Ҳоккайдодаги Саппоро шаҳрида эса бир сутка ичида 60 сантиметр қор ёғган.
Саппородаги қорнинг умумий қалинлиги айрим жойларда 133 сантиметрга етган. Ҳудудда поездлар қатнови вақтинча тўхтатилган. Секигахарада эса икки сутка давомида 98 сантиметр қор ёғган ва бу ҳам мазкур ҳудуд учун рекорд кўрсаткич ҳисобланади.
Япония метеорология агентлиги қор бўронлари кузатилган ҳудудларда яшовчи аҳолини электр таъминотида узилишлар бўлиши, қор кўчкилари хавфи ва бошқа бахтсиз ҳодисалар кузатилиши мумкинлигидан огоҳлантирган.
Аввал Австрияда қор кўчиши оқибатида беш киши ҳалок бўлгани, АҚШга ёпирилган бўрон оқибатида қарийб 300 минг киши электрсиз қолгани, Туркиядаги қор беш мингдан зиёд йўлни ёпиб қўйгани, Грецияда кучли қор сабаб 5 мингдан ортиқ машина иштирокида тирбандлик юзага келгани ҳақида хабарлар берилган.
Изоҳ (0)