Эстония ўз тарихида рекорд қийматдаги ҳарбий техника харид қилишни режалаштирмоқда. Эстония Мудофаа инвестиция маркази Латвия Мудофаа вазирлиги билан биргаликда умумий қиймати 693 миллион еврога тенг 16 хил турдаги ҳарбий техника сотиб олади. Бу ҳақда «Korrespondent.net» хабар берди.
«Қўшма харидлар, шубҳасиз, музокаралар учун анча яхши позиция гаровидир, шунингдек, савдо учун яхши шарт ва нархлар билан таъминлайди», — дейилади Мудофаа инвестиция маркази баёнотида.
Эстония Мудофаа инвестиция марказининг транспорт бўлими бошлиғи Томас Калданинг сўзларига кўра, тендер доирасида келгуси ўн йил ичида Эстония мудофаа кучлари, халқ лашкари (Мудофаа лигаси), полиция ва чегара қўшинлари, шунингдек, Латвия Мудофаа вазирлигига бўйсунадиган муассасаларнинг эҳтиёжлари учун кўп сонли 16 турдаги ускуналарни етказиб берадиган шерик топиш режалаштирилган.
Хариднинг бир қисми сифатида ҳам янги, ҳам ишлатилган ускуналар сотиб олинади. Харид икки босқичда амалга оширилади: биринчи босқичда юк кўтариш қуввати беш тоннагача бўлган автомобиллар, кейин эса кенгроқ жиҳозлар харид қилинади, дейилади хабарда. Эстония учун бу харид тарихдаги энг йириги бўлади.
Аввалроқ Эстония, Латвия ва Литва НАТОдан ушбу мамлакатлар ҳудудидаги ҳарбий иштирокини оширишни сўраганди. Қайд этилишича, НАТО ҳарбий иштирокини кенгайтириш Россияни «тийиб турувчи омил» бўлиши мумкин.
Изоҳ (0)