АҚШ Кобул аэропортидаги терактга жавобгар ИШИД ташкилоти етакчисининг шахси ёки қаерда эканини аниқлаш имконини берадиган маълумот учун 10 миллион доллар миқдорида мукофот эълон қилди, деб хабар беради Reuters.
Маълумот учун, мукофот АҚШ Давлат департаменти Дипломатик хавфсизлик хизматининг терроризмга қарши курашни рағбатлантириш дастури доирасида эълон қилинган. Хизмат вакиллари Кобул аэропортига ҳужумни ташкиллаштиришга Санауллоҳ Гафари исмли эркакни масъул дея ҳисобламоқда.
Агентлик маълумотларига кўра, Гафари ИШИДнинг бир бўлаги бўлган «Вилояти Хуросон» етакчисидир. Мазкур ташкилот террорчилари Ғарб томонидан қўллаб-қувватланган Афғонистон ҳукумати ва «Толибон»га қарши жанг қилган.
АҚШ Давлат департаментининг маълум қилишича, Гафари 2020 йилнинг июнида экстремистик гуруҳ томонидан ИШИДга раҳбарлик қилиш учун тайинланган. У Афғонистон ҳудудидаги барча операцияларни тасдиқлашга ва операциялар ўтказилишини молиялаштиришга масъул бўлган.
Ноябрь ойида Давлат департаменти Гафарини алоҳида аҳамиятга эга глобал террорчилар рўйхатига киритган.
Эслатиб ўтамиз, 2021 йилнинг августида Кобул аэропорти яқинида иккита портлаш юз берганди. Ўшанда 100 дан ортиқ одам ҳалок бўлган, ИШИД теракт учун жавобгарликни ўз бўйнига олган эди. Аэропорт яқинидаги терактдан кейин Жо Байден Кобулда террорчиларнинг янги ҳужумлари эҳтимоли ҳақида огоҳлантирган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)